2021 stáhtabušeahtta:

Áŋgiruššet nannoseappot mánáid- ja nuoraidkultuvrra ovdii

Mánáid ja nuoraid kultuvra lea mávssolaš vuoruheapmi, ja danin ráđđehus juolluda 20 miljovnna ođđa juolludeapmin dan ulbmilii. Máŋga áŋgiruššama čatnasit mánáid- ja nuoraidkulturdieđáhussii, mii ovddiduvvo 2021 giđa.

– Mii oaivvildit ahte mánát ja nuorat ánssášit seammá buori dáidda- ja kulturfálaldaga go mii ollesolbmot, dadjá kultur- ja dásseárvoministtar Abid Q. Raja.

Ráđđehus háliida, ahte buot mánát ja nuorat galget beassat vásihit dáidda- ja kulturovdanbuktimiid, ieža ovdanbuktit iežaset dáidaga ja kultuvrra bokte ja searvat kulturdoaimmaide ovttas earáiguin. Dat galgá lágiduvvot oadjebas rámmaid olis ja geahčakeahttá geografiijai, ekonomiijai, oskui, doaibmaváilliide, seksuála sodjui ja kulturduogážii.

12 miljovnna kruvnno juolluduvvojit doaimmaide, mat ovdanbuktojit dárkileappot 2021 giđa mánáid- ja nuoraidkulturdieđáhusa oktavuođas:

  • 4 miljovnnain kruvnnuin movttiidahttet ráhkadit eanet ođđa buvttademiid Kultuvrralaš skuvlaseahka olis
  • 4 miljovnnain kruvnnuin nannejit digitála gaskaomiid mánáid- ja nuoraidkultursuorggis
  • 4 miljovnnain kruvnnuin movttiidahttet gielddaid váldit mielde mánáid- ja nuoraidkultuvrra gielddaid plánemii

Ráđđehus evttoha maid juolludit 1 miljovnna kruvnno nationála mánáid- ja mediabarggu álggaheapmái, ja 2,7 miljovnna kruvnno iešguđet aktevrraide, mat leat ohcan doarjaga dihto ulbmilii lágiduvvon mánáid- ja nuoraiddoaimmaide, nu mo ovdamearkka dihte Kristiansunda Opera ja Norgga revyfágalaš guovddáš.

Ráđđehus árvala juolludit 4 miljovnna kruvnno Talent Norge junioráŋgiruššama joatkimii, man ulbmilin lea šaldut nuorra 13-18-jahkásaš taleanttaid ja ámmátdáiddáriid gaskka. Ulbmilin lea movttiidahttit Norgga taleanttaid ja dahkat geainnu ámmátbargui čielgasabbon sihke taleanttaide ja sidjiide geat sin háliidit veahkehit.