Allaleaktosaš govdabáddefálaldat lea sakka lassánan

Govdabáddefálaldat Norggas lea šaddan buoret ja buoret. Vuosttaš jahkebealis 2020 ledje sullii 89 proseantta dállodoaluin ožžon allaleaktosaš govdabáddefálaldaga (100 megabyte sekunddas).

- Lea movttiidahtti go mii jáhkkimis nagodat ollašuhttit gudneáŋgiris mihttomeari, ahte jagi 2020 leat sullii 90 proseantta dállodoaluin ožžon govdabáddefálaldaga, dadjá guovlo- ja digitálaministtar Linda Hofstad Helleland.

Nationala gulahallaneiseválddiid (Nkom) bargogohččuma mielde, lea konsuleantafitnodat Analysys Mason guorahallan mo govdabátti gokčandássi lea Norggas.

Sakka lassánan riikkadásis – lassánan eanemus doaresbealguovlluin

89 proseantta Norgga dállodoaluin lea dál govdabáddefálaldat mas leaktu lea 100 megabyte sekunddas. Smávva gilážiin lea sullii 56 proseantta dállodoaluin buorre gokčandássi, sullii 10 proseantta eanet go jagi 2019.

Fibergovdabáddi huksejuvvo ollesleavttuin Norggas, ja sullii 120 000 ođđa dállodoalu leat ožžon fibergovdabáddefálaldaga, ja lassáneapmi lea njeallje proseantačuoggá eanet go diibmá. Møre ja Romsdal ja Innlandet fylkkain lea fibergovdabáddefálaldat eanaš dállodoaluin.

- Munnje, guovlo- ja digitaliserenministtarin mearkkaša hui ollu ahte govdabáddefálaldat doaibmá bures boaittobealeguovlluin. Ovdáneapmi lea leamaš hui buorre, muhto eat leat vel áibbas duhtavaččat. Min mihttomearri lea ahte allaleaktosaš govdabáddi huksejuvvo buohkaide, dadjá Helleland.

Lea maid mearkkašan veara ahte sullii 98 proseantta riikka dállodoaluin lea 30Mbit/s sturrosaš vuorkásadji, mii lea sullii ovcci proseantačuoggá eanet go ovdal.


- 30Mbit/s sturrosaš govdabáddi lea doarvái stuoris dábálaš interneahttadoaimmaide ja videorávdnjemii. Márkanvuđot ja teknologalaš neutrála politihkka addá vejolašvuođa ovddidit ođđa doaimmaid ja ođđa bálvalusaid. Árppohis fierpmádaga huksen lea buorre ovdamearka dán suorggi hutkkálašvuhtii. Dasto galget buohkat oažžut allaleaktosaš fálaldaga, dadjá Helleland.


Stáhtadoarjja muhtun surggiide

Min riikkas gávdnojit guovllut gosa fitnodagaide ii gánnát hukset govdafierpmádaga. Stáhta addá doarjaga sihkkarastin dihte ahte fálaldat huksejuvvo maiddái smávit guovlluide.

2020 leat juolludan erenoamáš stuora supmi, namalassii 406 miljovnna ruvnno. Dainna juolludusain ožžot jáhkkimis sullii 30 000 dállodoalu ođđa dahje buoriduvvon govdabáddefálaldaga.

- Dát ráđđehus láhčá dili dasa ahte olbmot galget beassat ássat, bargat ja buvttadit árvvuid miehtá riikka. Dát ráđđehus lea juolludan eanet ruhtadoarjaga govdabáddehuksemiidda go ovddit ráđđehus. 2014 rájes lea sullii 1,3 miljárdda ruvnno juolluduvvon govdabáddehuksemiidda, ja dat dáidá dagahan ahte badjel 100 000 dállodoalu leat ožžon ođđa dahje buoret fálaldaga, dadjá Helleland.

Raporta lea almmuhuvvon Nkom ruovttusiidduin.

Gielda- ja ođasmahttindepartemeantta preassatelefovdna: 22 24 25 00