Arctica Svalbard vuođđudusa ásaheapmi

Kulturdepartemeanta ásaha ovttas Fritt Ord ja Kulturealáhusvuođđudusain Seastinbáŋku 1 Davvi-Norga ođđa vuođđudusa Arctica Svalbard, mii galgá láhčit dili dáidda- ja kulturdoibmii Svalbárddas.

Kulturministtar Linda Hofstad Helleland, Marit Reutz, Kulturealáhusvuođđudus Seastinbáŋku 1 Davvi-Norga ja Knut Olav Åmås, Fritt Ord direktevra.
Gurut ravddas: Kulturministtar Linda Hofstad Helleland, Marit Reutz, Kulturealáhusvuođđudus Seastinbáŋku 1 Davvi-Norga ja Knut Olav Åmås, Fritt Ord direktevra. Govva: Ketil Frøland/Kulturdepartemeanta

Arcitica Svalbard vuođđudusa ulbmilat:

  • Leat mielde ovddideamen norgga dáidda- ja kultursuorggi vai dáiddárat buotlágan šáŋŋeriin besset ráhkadit ja gaskkustit dáidagiiddis;
  • Nannet kultuvrralaš ja dáiddalaš ealáhusa Svalbárddas ja loktet beroštumi Svalbárdii destinašuvdnan;
  • Deattuhit riikkaidgaskasaš ja árktalaš jurddašanvuogi ja almmolaš lágidemiid bokte čalmmustahttit ja divaštallat davviguovlluid mearkkašumi;

- Sávan ahte Svalbárdda erenoamáš luondu movttiidahttášii dáiddáriid miehtá máilmmi.   Ovttas eará priváhta vuođđudeddjiin háliidat mii lasihit riikkaidgaskasaš beroštumi Svalbárdii ja davviguovlluide, ja bargat norgga dáiddasuorggi ovdáneami ovdii, cealká kulturministtar Linda Hofstad Helleland.

- Svalbárda lea okta Kulturealáhusvuođđudusa SeastinBáŋku 1 Davvi-Norgga vuoruhansurggiin. Mii jáhkit ahte ásaheapmi váikkuha ealáhusovdáneapmái, ja buktá dehálaš bargosajiid, ja ahte Svalbárda oažžu ollu fuomášumi ja beroštumi máilmmidásis, dadjá stivrajođiheaddji Marit Reutz.

- Vuođđudus Fritt Ord lea ilus go beassá searvat váikkuheames Svalbárdda gelddolaš prošeavttaid ja doaimmaid. Dat gusto dáiddasuorgái, muhto mii háliidat maid ovddidit kritihkalaš, máhttovuđot divaštallamiid davviguovlluid ovdáneami birra, erenoamážit dálkkádat- ja politihkkasuorggis, dadjá Fritt Ord direktevra Knut Olav Åmås.   

Kulturdepartemeantta jagi 2017 bušeahtas lea árvaluvvon 2,5 milj. kruvnnu ásaheapmái  – sihkkarastin dihte vuođđudusa jođiheami ja hálddahusa. Dan lassin juolludeaba Fritt Ord ja Kulturealáhusvuođđudus goabbáge golbma milj. kruvnnu. Seastinbáŋkovuođđudus DNB dahká dan seamma. 

Vuođđudusa stivra:

  • Jan-Frode Janson (stivrajođiheaddji)
  • Anne Katrine Dolven
  • Marit Anne Hauan
  • Kjetil Trædal Thorsen
  • Moa Björnson (fásta oassálasti várrelahttu)  

Dieđut stivramiellahtuid birra:

Jan-Frode Janson (r. 1969) lea eret Troandimis ja oahppan ekonoma ja lea jagi 2013 rájes bargan Seastinbáŋkku 1 Davvi-Norgga konseardnahoavdan.   

A K (Anne Katrine) Dolven (r. 1953) lea máŋggasuorggatdáiddár ja ássá Lofuohtas ja su dáidda lea čalmmustahttojuvvon ollu báikkiin ja ollu ásahusat leat oastán su dáidagiid. Kulturviessu Stormen, Bådådjos lea earret eará čiŋahuvvon su dáidagiiguin.

Marit Anne Hauan (r. 1955) lea Tromssa Musea direktevra. Son lea dutki Tromssa Universitehtas ja lea almmuhan ollu artihkkaliid ja girjji Svalbárdda ruvkeeallima birra. Hauan lea bargan doaimmaheaddjin olu áigečállagiin ja Brage-bálkkašumi vuoiti guovtti girjjis Nordnorsk kulturhistorie.

Kjetil Trædal Thorsen (r. 1958) lea eret Karmøyas ja lea oahppan arkiteakta ja son lea arkiteaktakantuvrra Snøhetta mielvuođđudeaddji.  

Moa Björnson (r. 1985) lea oahppan kaospilohta ja ovddida kulturealáhusaid, innovašuvnna ja servodatovdáneami davviriikkalaš perspektiivvas, ja lea 2015 rájes bargan ovdánahttinhoavdan Træna gielddas, Nordlánddas.