Dán jagáš boazosuvdin geasseorohagaide lea bures jođus
Ođas | Almmustahtton: 30.04.2025 | Eanadoallo- ja biebmodepartemeanta
Dán jagáš boazosuvdin lea bures jođus. Oktiibuot 8000 bohcco galget fievrriduvvot Romssa ja Finnmárkku rittu sulluide.
Máŋga orohaga eai birgeše suvdima haga go johtet geasseorohahkii ja geasseorohagas ruovttoluotta. Dán jagáš giđđasuvdin álggii cuoŋománu 19. beaivvi ja bistá miessemánu 1. beaivái. Fanas mii geavahuvvo suvdimii lea suodjalusa ovddeš gáddefanas/prámá.
Boazoeaiggádat geat dárbbašit suvdima sáhttet dan ohcat Tromssa ja Finnmárkku Stáhtahálddašeaddjis. Stáhtahálddašeaddji árvvoštallá dasto dárbbu siidaoasi historjjálaš guovllugeavaheami ja suvdindárbbu vuođul. Ortnet ruhtaduvvo jahkásaš boazodoallošiehtadusa bokte maid stáhta, Eanandoallo- ja biebmodepartemeantta bokte, ja Norgga Boazosápmelaččaid Riikkasearvi (NBR) šiehtadallet. Šiehtadallanbealit leat soahpan joatkit várret 6 miljovnna ruvnno suvdimii 2025/2026 Boazodoallošiehtadusas.
- Boazosuvdin lea fievrridanortnet daid orohagaid/siiddaid siidaosiid várás mat dárbbašit suvdit bohccuid áigodatguohtumiid gaskka meara rastá.
- Historjjálaččat leat sullot ja njárggat adnojuvvon boazoguohtuneanamin. Ovdal lávejedje vuojahit bohccuid nuriid ja vuonaid rastá olu dáidda sulluide. 1970-logu mielde šattai boazosuvdin bistevaš ortnegin Romssa ja Finnmárkku boazodollui. Sivvan dasa go gáddefanasgeavaheapmi lassánii, lei go iešguđetlágan sisabahkkemat ja huksemat giddejedje boazodoalu árbevirolaš johtingeainnuid, ja šattai álkit beassat sulluide gáddefatnasiiguin. Dál lea priváhta fitnodat mii eaiggáduššá ja jođiha prámá.
- Romssa ja Finnmárkku stáhtahálddašeaddji mearrida suvdinplána. Suvdinplána lea vuoruhuvvon listu daid siidaosiid dáfus mat leat ožžon prámásaji. Plána almmuha áiggi ja lástenbáikki. Lástenbáikkis galgá leat dárbbašlaš infrastruktuvra mii deavdá elliidčálgolága gáibádusaid.
- Oktiibuot fievrriduvvojit birrasiid 8000 bohcco juohke giđa ja juohke čavčča Romssa ja Finnmárkku sulluide ja njárggaide ja ruovttoluotta.