Stáhtabušeahtta 2018

Arkiivadoaimmahat nannejuvvo 15 milliuvnna ruvnnain

Ráđđehus evttoha nannet juolludemiid Arkiivadoaimmahahkii 15 milliuvnna ruvnnain nu ahte šaddá álkibun gávdnat eanet arkiivamateriála. Arkiivadoaimmahat áigu dáinna doarjagiin nannet bargguid hálddašit digitála hábmejuvvon arkiivvaid. Dasa lassin addá dát doarjja eanet magasiidnakapasitehta báberarkiivvaide ja eanet vejolašvuođa digitaliseret báberarkiivvaid.

– Arkiivvat leat min oktasaš muitu ja dehálaš gáldut máhttui ja vásáhusaide. Dán dehálaš oasi min kulturárbbis fertet mii áimmahuššat bures nu ahte dat rahpasa eanet maiddái boahttevaš buolvvaide. Mii háliidit nannet doarjagiid Arkiivadoaimmahahkii nu ahte nákcet lasihit bargguid váldit vára dáin arkiivvain dálá áigái ja boahtte áigái, dadjá kulturministtar Linda Hofstad Helleland.

10 milliuvnna galgá adnojuvvot sihkkarastit ja hálddašit digitála hábmejuvvon dokumeanttaid ja arkiivvaid. Dat leage leamašan dat stuorimus hástalus arkiivasuorggis máŋggaid jagiid.

Juolludeapmi lasihuvvo vel 5 milliuvnna ruvnnain, nu ahte Našunálagirjerádjosa rusttet Muoffis (Måahvie) sáhttá váldot atnui báberarkiiva vuorkán. Dakko bokte luvve magasiidnasaji Arkiivadoaimmahagain Hamaris ja Oslos. Oassi arkiivvain mat sirdojuvvojit sáhttet maid digitaliserejuvvot Našunálagirjerádjosa rusttegiin. Dakko bokte rahpasit dát arkiivvat buohkaide Norggas.