Bent Høie lea ožžon áššedovdilávdegotti raportta virusvektorboahkuid birra

Informasjon om koronasituasjonen endrer seg raskt og kan derfor være utdatert. 

Sjekk temasiden Koronasituasjonen for siste nytt fra regjeringen, eller Helsenorge.no for oversikt over råd og regler om koronaviruset på samisk.

Dearvvašvuođa- ja fuolahusministtar Bent Høie oaččui vuossárgga miessemánu 10.beaivve áššedovdilávdegotti raportta virusvektorboahkuid birra Norggas. Raporttas ávžžuhuvvo ahte AstraZeneca ja Janssen boahkut eai galgga Norgga korona- boahkuhanprográmmas geavahuvvot. Lávdegoddi ávžžuha ahte boahkut galget leat fidnemis vaikko eai leat prográmmas mielde, muhto sii eai leat ovttaoaivilis das makkár eavttuid vuođul boahkut galget geavahuvvot.

-Lávdegoddi lea oanehis áiggis čađahan stuora ja buori barggu. Ráđđehus áigu dál dárkilit geahčadit raportta ja geavahit raportta ja Álbmotdearvvašvuođainstituhta ávžžuhusaid mearridanvuođđun go loahpalaččat meannuda dán sorttat boahkuid geavaheami, dajai Høie go raportta vuostáiválddii.

Áššedovdilávdegoddi, maid Lars Vorland lea jođihan lea ollislaččat árvvoštallan virusvektorboahkuid geavaheami riskka, sihke indiviidadásis ja servodatdásis. Lávdegotti miellahtut bohtet sihke Norggas ja olgoriikkas, ja sii leat earret eará árvvoštallan riikkaidgaskasaš dieđuid mat gusket liigeváikkuhusaide ja riskkaide.

Dehálaš servodaga rahpamii
Lea hirbmat dehálaš boahkuhit olles álbmoga vai beassat fas ráhpat servodatdoaimmaid Norggas.

Boahkuheapmi AstraZeneca-boahkuin lea gaskaboddosaččat bissehuvvon Norggas njukčamánu 11.beaivve danne go fuomášuvvui ahte olbmot ožžo hárvenaš ja duođalaš liigeváikkuhusaid. Álbmotdearvvašvuođainstituhtta ávžžuhii cuoŋománus váldit dán sorttat boahkuid eret boahkuhanprográmmas go lea stuora riska oažžut hárvenaš ja hui duođalaš liigeváikkuhusaid. FHI lea dan árvvoštallan Norgga njoammundili ektui.

Ráđđehus háliidii ahte lávdegoddi vuđolaččat árvvoštallá boahkuid liigeváikkuhusaid eará riikkain, ja maid boahkuid bisseheapmi mearkkaša servodahkii ja álbmogii oppalohkái. Danne nammaduvvui áššedovdilávdegoddi árvvoštallat liigeváikkuhusaid go AstraZeneca ja Janssen boahkuid geavaheami bisseha dahje ii bisset Norggas.

-Maŋimuš áiggi leat ožžon ollu buriid ođđasiid boahkuid geavaheamis. Mii oažžut eanet ja eanet Pfizer-BioNTech-boahkuid, ja dieđut čájehit ahte dat suddjejit hui bures juo golmma vahku maŋŋá vuosttas boahkuheami. Danne leat guhkidan vuordináiggi vuosttaš ja nuppi boahkuheami gaskka vai eambbogat boahkuhuvvojit johtileappot. Dat oktiibuot mielddisbuktá ahte virusvektorboahkuid ii leat dárbu geavahit, dadjá Høie.   

Áššedovdilávdegotti ávžžuhusat
Áššedovdilávdegoddi lea árvvoštallan ehtalaš ja rievttálaš beliid, servodatekonomalaš váikkuhusaid ja mo doaibmabijut bohtet čuohcat dearvvašvuođa- ja sosiáladillái. Lávdegoddi nanne ahte virusvektorboahkut oppalaččat nagodit suodjalit covid-19 vuostá.   Ávžžuhus, ahte AstraZenaca ja Janssena boahkut eai váldojuvvo boahkuhanprográmmii mielde,  lea dahkkon njoammundili ektui Norggas.

-Njoammundili leavvan, ođđa virusat, vuorddekeahtes váttisvuođat boahkuid vuovdimiin ja vejolaš ođđa dieđut liigeváikkuhusaid birra sáhttet rievdadit loahppabohtosa, daddjo raporttas.  

Lávdegoddi oaivvilda ahte dál ii leat vuos vejolaš duođaštit goappá boahkkosorttas lea  eanet riska oažžut duođalaš liigeváikkuhusaid, nu go vuoiŋŋašdohppehaga ja vardima. Lávdegoddi ii sáhte dan geažil sohkabeali ja ahkejoavkku mielde mearridit geat virusvektor-boahkuid galggašedje oažžut.    

Eaktodáhtolaš geavaheapmi
Lávdegottis lea guovttelágan oaidnu das makkár eavttut galget čuvvojuvvot jos olbmot háliidit  geavahit boahkuid mat eai leat boahkuhanprográmmas mielde. Eanetlohku oaivvilda ahte dálá njoammundili ektui Norggas lea dušše muhtun spiehkastagaiguin dohkálaš fállát virusvektorboahkuid.  

Lávdegotti unnitlohku oaivvilda ahte  AstraZeneca ja Janssen boahkuid galgá sáhttit fállat dálkkasčujuhusain, jos olbmot dan háliidit. Sii deattuhit ahte juohkehaš sáhttá ieš buoremusat árvvoštallat riskabeliid, iežas dili ja dárbbu vai boahku oažžu árabut go muđui.

Loga lávdegotti mandáhta ja geat das leamaš mielde.

Áššedovdilávdegoddi virusvektorboahkuid birra – ráđđehus.no