Boazodoallošiehtadusa 2018/2019 šiehtadallamat – NBRa gáibádus

Norgga boazosápmelaččaid riikasearvi (NBR) geigii odne Stáhtii, Eanadoallo- ja biebmodepartemeantta bokte iežas gáibádusa 2018/2019 boazodoallojagi boazodoallošiehtadussii. Gáibádusa ekonomalaš rámma lea 157,57 miljovnna ruvnnu, mii lea 38,97 milj.ruvnnu eanet go dálá šiehtadus mii lea 118,6 miljovnna ruvnnu. Lassáneapmi dahká sullii 33 proseantta.

NBR čujuha gáibádusastis ollu dehálaš ja dárbbašlaš doaibmabijuide maid sii oaivvildit leat dehálaččat sihkkarastet  jos galget olahit mihttomeriid dahkat boazodoalu ekologalaččat, ekonomalaččat ja kultuvrralaččat  guoddevažžan. Lassin divatgeahpádusa fievroboaldámuššii gáibiduvvo joatkit goluidunnideaddji doarjagiid ja njuolggodoarjagiid muhtin rievdadusaiguin ja máksomeriid lasihemiiguin. Boazodoalu Ovddidanfoanda evttohuvvo lasihuvvot nannen dihte earret eará boazodoalu infrastruktuvrra ja rekruterema, buriid DBS-bálvalusaid, ja buoridit nissonolbmuid eavttuid ealáhusas. Organisašuvdnadoarjagii evttohuvvo stuora lassáneapmi. Evttohuvvo lasihit čálgoortnegiid gokčat goluid sadjásažžii vuosttas 16 beaivve  buozalmasvuođa oktavuođas, ja evttohuvvo dasto ođđa sadjásašdoarjja luomu oktavuođas.

Dat lea viiddis gáibádus maid NBRa odne lea geigen Stáhtii. Dat gusto sihke ekonomalaš rámmii ja sisdollui. Šiehtadallamat šaddet hui gáibideaddji dan geažil go ođđa doarjjaortnegat leat evttohuvvon ja go evttohuvvo máhcahit ortnegiid mat maŋimuš jagiid leat heaittihuvvon, cealká Stáhta šiehtadallanjoavkku jođiheaddji, ekspedišuvdnahoavda Anne Marie Glosli.

Stáhta ovddida iežas fálaldaga guovvamánu 13.b. Šiehtadallamat galget loahpahuvvot ovdal njukčamánu 1.b. 2018. 

Norgga Boazosápmelaččaid Riikkasearvvi (NBR) jođiheaddji Ellinor Marita Jåma geigii NBRa gáibádusa Stáhta šiehtadallanjođiheaddjái Anne Mari Glosli.
Norgga Boazosápmelaččaid Riikkasearvvi (NBR) jođiheaddji Ellinor Marita Jåma geigii NBRa gáibádusa Stáhta šiehtadallanjođiheaddjái Anne Mari Glosli. Govva: Eanandoallo- ja biebmodepartemeanta