Stuoradikki dieđáhus boazodoallopolitihka birra:

Boazodoallu. Guhkes árbevierru – erenoamáš vejolašvuođat

Ekologalaš ceavzilis doaibma ja lassi buvttadeapmi addá boazodollui erenoamáš vejolašvuođaid. Dieđáhusas almmuhuvvojit strategiijat ja doaibmabijut vai ealáhus buorebut beassá ovddidit ulbmillaš ja márkanvuđot ealáhusa. Boazodoallu galgá vuosttamužžan viežžat sisaboađu go vuovdá bivnnut ja erenoamáš buktagiid ja bálvalusaid márkanii. Dat sihkkarastá birgenlági dán erenoamáš ealáhussii ja addá maid boazodollui vuođu doaibmat kultuvrraguoddin.

Dat lea váldosisdoallu Stuoradikki dieđáhusas nr. 32 Boazodoallu. Guhkes árbevierru – erenoamáš vejolašvuođat, maid Ráđđehus odne ovddida.

Duoddaris borranbeavdái

Buresdoaibmi bohccobiergomárkan lea áibbas guovddážis dasa ahte olahit boazodoallopolitihkalaš mihttomeriid. Bohccobiergobuktagiid kvalitehta lea buorránan. Ođđa klassifiserenvuogádat bálkkaša buriid biergobuktagiid. Ráđđehus háliida čatnat muhtun boazodoallošiehtadusa guoskevaš doarjjaortnegiid njuolga dan ođđa vuogádahkii.  

– Mii eaktudat ahte boazodoallu lea ođđaáigásaš ja gilvonávccalaš ealáhus mii buvttada bierggu márkanii mii jearaha ja háliida dearvvašlaš ja dorvvolaš biebmu, cealká eanandoallo- ja biebmoministtar Jon Georg Dale. 

Bákkolaš indiviidamerken

Nannen dihte boazodoalu sajádaga áigu ráđđehus áiggi mielde ásahit bákkolaš indiviidamerkenvuogádaga. Dát merkenvuohki boahtá lassin árbevirolaš bealljemerkenvuogádahkii.

– Indiviidamerken mielddisbuktá ahte boazoeaiggádat ožžot johtileappot ja sihkkaris mávssu boazonjuovahagain daid bohccuid ovddas maid vuvdet, dadjá Dale.  – Dan lassin addá indiviidamerken vejolašvuođa buorebut dárkkistit boazologu. Boazolohku lea deháleamos rámmaeaktu juohke boazoeaiggádii, deattuha Jon Georg Dale.  

Boazologu almmuheapmi

Ráđđehus háliida fámuhuhttit njuolggadusaid mat gusket ovttaskas boazoeaiggáda boazologu almmuheapmái dainna ulbmilin ahte buohkat boazodoalus ožžot dieđuid boazologuin.   

– Go boazoeaiggádat dihtet nuppiid boazologu, de dat sáhttá váikkuhit dasa ahte boazoeaiggádat šaddet duostileappot vuovdit eanet, dadjá Dale. Dat fas mielddisbuktá dasa ahte bohccobiergu mas lea alla kvalitehta gávdno jámmat biergomárkaniin, ja boazolohku maid heivehuvvo guohtumiidda, joatká eanandoallo- ja biebmoministtar.  

Siskkáldas iešstivren

– Siskkáldas iešstivren maid boazoealáhus oaččui 2007 boazodoallolágas galgá joatkašuvvot  ja nannejuvvot, cealká Dale. –Rievdadusárvalusat mat dál ovddiduvvojit galget oppalohkái ovddidit boazodoalu ekologalaš ceavzilis guvlui mii sihkkarastá bistevaš ekonomalaš rámmaid ja addá vuođu jođihit bearašboazodoalu, dadjá eanandoallo- ja biebmoministtar Jon Georg Dale.   

Erenoamáš vásáhusat

Boazodoallu sáhttá fállat erenoamáš ja árbevirolaš bálvalusaid main mátkeealáhus ja heivehuvvon oahppan- ja fuolahusvuđot bálvalusat leat guovddážis.  Boazodoallobearraša buvttadan árvvut lassin biergobuvttadeami leat mearrideaddjin bearraša dienasvuđđui.

– Dat eai leat nu ollu ealáhusat geat sáhttet nu go boazoealáhus fállát mátkeealáhusbálvalusaid  ja bálvalusaid mat gusket fuolahussii, oahppamii ja eará doaimmaid maid servodat ohcala, dadjá eanandoallo- ja biebmoministtar Jon Georg Dale.

Ráđđádallamat

Ráđđádallanšiehtadusa vuođul leat čađahuvvon ráđđádallamat Sámedikkiin ja Norgga Boazosápmelaččaid Riikkaservviin dieđáhusa doaibmabijuid árvalusaid birra. Ráđđádallamiid bokte leat boazodoallopolitihka dárkilit guorahallan.