Dálkkádatnuppástus ja ruoná gilvofámu máhttu

Ráđđehus nanne dálkkádatdutkama. Bušeahtas evttohit lasihit 20 miljovnna ruvnno dutkamii mii galgá váikkuhit dálkkádatgássaluoitimiid geahpideapmái, earenoamážit fievrredeamis ja eanandoalus.

-Dutkan ja máhttu lea mearrideaddjin vai Norga joksá dálkkádatmihtuid ja ovddida ođđa, ruoná bargosajiid. Danin mii nannet dutkama ja ođđahutkama bargguid, dadjá dálkkádat- ja birasministtar Vidar Helgesen.

2018:s bušeahtas evttoha ráđđehus dutkama nannet vuollegisluoitima ja ruoná gilvofámu hárrái 20 miljovnna ruvnnuin Dálkkádat- ja birasdepartemeantta bušeahtas.

Ráđđehus almmuhii dán jagi ođđa áŋgiruššama dutkat vuollegisluoitimiid 71,5 miljovdna ruvdnosaš rámmain jahkásaččat. Áŋgiruššan galgá gávdnat ođđa čovdosiid dálkkádatgássaluoitimiid unnideapmái Norggas ja deavdit norgga dálkkádatmihtuid jagi 2030 guvlui. 20 miljovnna ruvdnosaš lassánemiin lea ollislaš rámma 91,5 miljovnna 2018:s.

-Dát šaddá njunnošii Dutkanráđi vuollegisluoitindutkama barggus. Mihttu lea ahte birasustitlaš energiteknologiijas ovdánit áibbas ođđa buktagat ja bálvalusat ja jođáneappot váldojit atnui. Dát sáhttá váikkuhit ahte geahppánit gássaluoitimat sihke Norggas ja riikkaidgaskasaččat, dadjá Vidar Helgesen.

Áŋgiruššamii leat vuođđun Dutkanráđi dálá nannenbarggut, das leat mielde prográmmat ENERGIX ja BIONÆR.

Muhtun oassi ruđain mannet Pilot-E prošeavtta bokte. Pilot-E lea ruhtadanfálaldat norgga ealáhusdoibmii, man Dutkanráđđi, Innovašuvdna Norga ja Enova leat ceggen. Pilot-E čuovvula aktevrraid buot teknologiijaovddideamis - jurdaga rájes gitta gávpemárkanii. 2017:s lea ávkefievrredeapmi nannámis almmá luoitima haga leamaš earenoamáš vuoruhuvvon fáddá áŋgiruššamii, ja dat lea čuovvuluvvon earret eará Pilot- E ortnega bokte sierra almmuhemiin.