Iešheanalis Norgga girku

Ráđđehus árvala ahte Norgga girku ásahuvvo riektesubjeaktan. Nationála ja guvllolaš girkolaš ásahusaid báhpabálvalusaid ja bargiid bargoaddiovddasvástádus sirdojuvvo stáhtas girkui. Stáhta galgá ain ruhtadit girkolaš ásahusaid rámmadoarjagiid bokte. Girkosuorgái gullevaš ekonomalaš ovddasvástádusjuohkin gaskal stáhta ja gielddaid galgá viidáset fievrriduvvot.  

Prop. 55 L (2015-2016) Girkolága rievdadusat (Norgga girku ásahit iešheanalis riektesubjeaktan jna.) Dokumeanta lea girjegillii.

- Sihke servodahkii, girkui ja stáhtii lea buot buoremus ahte leat čielga ráját stáhta ja girku gaskka, cealká kulturministtar Linda Hofstad Helleland.

- Norgga girku lea dehálaš ollu olbmuide. Ráđđehus háliida ovddidit politihka mii fuolaha ahte girku ain doaibmá álbmotgirkun buohkaid várás, dadjá kulturministtar.

- Dat eai leat vuostálasvuođat das ahte bisuhit girku álbmotgirkun ja doarjut máŋggabealat oskkuid ja eallinoainnuid mat gávdnojit min servodagas. Mun oaivvildan ahte mii leat  dássedit vuhtiiváldán osku- ja eallinoaidnoservodagaid ja dan ahte norgga servodahkii lea Norgga girkus historjjálaš mearkkašupmi. Jáhkán ahte girkolága rievdadusárvalus oažžu viiddis doarjaga, dadjá kulturministtar Hofstad Helleland.

Girkolaš hálddašanođastus lea historjjálaš olahus ollujagiid ja dássedis ođastusproseassas gos Norgga girku árvaluvvo iešheanalis ásahussan nu ahte ráját girku ja stáhta gaskka šaddet čielgaseabbon.

Ođastusa ektui lea mis leamaš lagas gulahallan Norgga girkuin ja sullii 1 600 bargiin geaidda dat čuohcá. Girkoráđđi lea bargan vuđolaš barggu ovddidit hálddahuslaš vuogádagaid ja dárbbašlaš njuolggadusaid.

Go ráđđehus dál ovddida láhkaárvalusa Stuoradiggái, de lea vejolaš Girkočoahkkimis  meannudit ášši cuoŋománus ja plánaid mielde sáhttá de ođastus fápmuduvvot ođđajagimánu 1.b.2017.

Gulaskuddandokumeanttat áššis gávdnojit Kulturdepartemeantta ruovttusiidduin (Dokumeanta lea girjegillii)

Kulturdepartemeanttas leat sierra neahttasiiddut girku ja stáhta birra, Reformašuvnna rájes gitta vuođđoláhkarievdadusaid rádjai 2012. 

Sihke Norgga girkus ja Girkoráđis lea sierra neahttasiidu stáhta ja Norgga girku guoskevaš rievdadusaid birra.