Stáhtabušeahtta:

Doaimmaid ja nuppástusa kulturbušeahtta: 13,5 miljárdda kruvnna kultuvrii

Ráđđehusa 2017 kulturbušeahttaevttohus lea oktiibuot 13,5 miljárdda kruvnna. Bušeahtas leat golbma váldovuoruheami: Kultuvrralaš ja hutkás ealáhus, kulturárbi ja láhčit eanet ruhtadangálduid kultursuorgái.

Kulturbušeahttaevttohus lea 465 miljovnna kruvnna eanet go 2016:s. Dát mearkkaša 3,6 proseantasaš lassáneapmi. Evttohus doarju Ráđđehusa bargo-, doaibma- ja nuppástuspolitihka. Norgga ekonomiija nuppástuvvo. Ráđđehus háliida láhčit dili vai kultuvra maiddái sáhttá leat ealáhus, ja vai eambbosat sáhttet eallit dáidagiin ja kultuvrrain. Kultuvra- ja dáiddaealáhussuorgi ovdána, ja das leat vejolašvuođat hábmet ođđa ja gánnáhahtti bargosajiid Norgii.

70 miljovnna dáiddasuorggi ealáhusaide

- Kultuvra, valáštallan ja eaktodáhtolašvuohta addet min eallimii sisdoalu. Dat addet midjiide nana searvevuođa miehtá riikka. Ráđđehussii lea buorre almmolaš ruhtadeapmi das mii lea dehálaš midjiide, dehálaš. 2017 bušeahtas mii vuoruhat loktet dáiddasuorggi ealáhusaid. Ráđđehus evttoha juolludit badjel 70 miljovnna kruvnna doaibmabijuide mat galget láhčit dili kultuvrralaš ja dáiddásuorggi ealáhusaid lassáneapmái ja ovdáneapmái, ja nannet dáiddáriid vejolašvuođat dinet eanet. Vuoruheapmái gullet buotlágan ovdanbuktinvuogit, dadjá kulturministtar Linda Hofstad Helleland.

Kultursuorggi ekonomiija buorrána

- Norggas leat olu čeahpes dáiddárat ja nana eaktodáhtolašvuohta, muhto maiddái kultursuorgi dárbbaša nuppástusa. Mii háliidat buoridit kultursuorggi ekonomiija, earret eará viiddidettiin skeaŋkanannenortnega, mii dagaha ahte almmolašvuohta nanne priváhta addiid skeaŋkkaid. Mii lasihat ortnega badjelaš 6 miljovnnain kruvnnain. Mii lasihat maiddái doarjaga dáiddalaš taleanttaid ovdáneapmái Talent Norge bokte 5 miljovnnain kruvnnain, mii fas addá eanet ruđa priváhta aktevrrain, dadjá Hofstad Helleland.

50 miljovnna kulturárbái

- Ráđđehus háliida áimmahuššat iežamet kulturárbbi ja suddjet iežamet kulturmuittuid. Oassin doaibmabidjopáhkas bargguhisvuođa vuostá mii evttohat juolludit 50 miljovnna kruvnna divodit ja ođasmahttit girko- ja museavisttiid. Dien láhkai mii sáhttit sihke oažžut eanet olbmuid bargui ja seammás fuolahit divodit dehálaš kulturmuittuid, dadjá kulturministtar Linda Hofstad Helleland.