Doarjja eallinoainnu bealátkeahtes seremoniijalanjaide

Kulturdepartemeanta juolluda 10,3 miljovnna ruvnno eallinoainnu bealátkeahtes seremoniijalanjaide jagi 2014:s. Eanas ruđain mannet viđa fylkkasuohkaniidda mat leat mielde geahččalanortnegis mas galget láhččet eallinoainnu bealátkeahtes seremoniijalanjaid fylkkas. Dát vihtta leat Oslo, Akershus, Rogaland, Lulli-Trøndelága ja Romssa fylkkasuohkanat.

Dása lassin lea Kulturdepartemeanta almmuhan ruđaid ohcan ládje plánet dahje ásahit seremoniijalanjaid olggobealde daid viđa fylkkain mat leat mielde geahččalanortnegis.

- Ohcamušat duođaštit ahte lea dárbu ásahit eallinoainnu bealátkeahtes seremoniijalanjaid suohkaniin. Doarjagat galget láhččet báikkálaš heivehemiid, dadjá kulturministtar Torhild Widvey.

Kulturdepartemeanta juolluda doarjaga čuovvovaš prošeavttaide:

  • 500 000 ruvnno Skien girkolaš oktasašráđđái Gjerpen kapealla ja Nordre kapealla čiŋaheapmái ja ođasmahttimii mat dál juo geavahuvvojit  eallinoainnu bealátkeahtes seremoniijalatnjan.
  • 500 000 ruvnno Vestfold liikaboalddáhahkii (krematoriijai) mii pláne suohkaniid gaskasaš eallinoaidnobealátkeahtes seremoniijalanja Sandefjordii go leat huksemin ođđa liikaboalddáhaga.
  • 1 miljovnna ruvnno Helgelándda liikaboalddáhahkii mii pláne eallinoaidnobealátkeahtes seremoniijalanja guovllu ođđa liikaboalddáhaga oktavuođas mii plánejuvvo Mussirii.
  • 1 miljovnna ruvnno Røyken suohkanii mii lea huksemin ođđa girko- ja kulturviesu ja áigot vistái ásahit eallinoaidnobealátkeahtes seremoniijalanja mas galget leat gitta 400 čohkkánsaji. 
  • 500 000 ruvnno Arendal suohkanii Barbu kapealla divodeapmái ja dan láhččet ođđa eallinoaidnobealátkeahtes seremoniijalatnjan Arendalii.