Eambbogiid boahkuhit

Informasjon om koronasituasjonen endrer seg raskt og kan derfor være utdatert. 

Sjekk temasiden Koronasituasjonen for siste nytt fra regjeringen, eller Helsenorge.no for oversikt over råd og regler om koronaviruset på samisk.

Dál lea hoahppu fállat eanet dievasmahttinboahkuid. Ráđđehus dáhttu Suodjalusa veahkehit gielddaid, mat dárbbašit veahki boahkuheapmái. Gielddaide galgá maid šaddat álkibun oažžut boahkuhanveahki apotehkain.

-Min mihttomearri lea ahte buohkat, geat leat deavdán 45 jagi ožžot fálaldaga váldit ođastandosa nuppi vahku rájes, ovdal ođđajagimánu gaskkamuttu. Mihttomeari juksamii dárbbašat ođđa doaibmabijuid. Gielddat barget buot maid nagodit, vaikke sis lea ge badjelmeari bargu jur dál. Ráđđehus dáhttu Suodjalusa ásahit bargojoavkku, mii sáhttá gielddaid veahkehit boahkohanbargguin.  Eaktodáhtolaš organisašuvnnat, bátnedoaktárat, fitnodatdearvvašvuođabálvalusa bargit ja divššárat geat barget buohcceviesuin sáhttet leat mielde dakkár joavkkus, dadjá stáhtaministtar Jonas Gahr Støre (Bb).

-Boahkut suodjalit heakka. Sii geat dál gártet buohccevissui leat vuosttažettiin boahkutkeahtes olbmot ja boarrásat geat leat váldán dušše guokte boahkkodosa. Dat iešalddis juo muitala man dehálaš lea váldit dievasmahttindosa. Mii rehkenastit ahte dievasmahttindosa suodjala duođalaš dávddaid vuostá, maiddái omikronvariántta vuostá, dadjá dearvvašvuođa- ja fuolahusministtar Ingvild Kjerkol (Bb).

Lea mávssoleamos boahkuhit buohkaid, geat leat badjel 65 jagi, ja 18-64 jahkásaččaid geain lea alla riska duođalaččat buohccát covid-19-dávddain ja  dearvvašvuođa- ja fuolahusbálvalusa bargiid.  Lea dehálaš ahte  dearvvašvuođabálvalusa bargit boahkuhit iežaset suodjalan dihte eará dearvvašvuođabargiid ja divššohasaid. Ráđđehus ávžžuha gielddaid joatkit skuvla- ja mánáidgárdebargiiguin geat leat deavdán 45 jagi, maŋŋil go badjel 65 jahkásaš riskajoavkkut leat boahkuhuvvon.

Apotehkat leat mielas veahkehit boahkuhanbargguin. Ovttasbargu gielddaid ja apotehkaid gaskka lea dál buorránan maŋŋil go gielddat besset geavahišgoahtit standárdašiehtadusa go lea dárbu. Gielddaide galgá leat dál álkit vuostáiváldit boahkuhanveahki apotehkain, dadjá Kjerkol. Seammás oaniduvvo áigi nuppi ja dievasmahttindosa gaskka 4,5 mánnui sidjiide geat leat  deavdán 45 jagi, ja rávisolbmuide geain lea erenoamáš stuora riska duođalaččat buohccát covid-19-dávddain ja  dearvvašvuođa- ja fuolahussuorggi bargiide. ÁDI áigu sáddet eanet boahkuid ovdal juovllaid, vai gielddat besset fállagoahtit dievasmahttinboahkuid buohkaide geat leat badjel 45 jagi, muhto eaktuduvvo ahte áigi nuppi ja ođasmahttindosa gaskka lea 4,5 mánu.     

-Áiggun maid muittuhit ahte lea hirbmat mávssolaš ahte dearvvašvuođabargit ožžot ođasmahttindosa johtilit. Dat guoská sihke gielddadearvvašvuođabálvalusa ja spesialistadearvvašvuođabálvalusa bargiide. Mun áiggun maid garrasit ávžžuhit sin, geat eai leat vel váldán vuosttas ja nuppi boahkkodosa, ahte váldet daid. Gielddat bidjet ollu návccaid dasa ahte ássit ožžot boahkuid, ja maŋŋil go omikronvirus leavvagođii de lea boahkuhanbargu šaddan ain deháleappot, dadjá dearvvašvuođa- ja fuolahusministtar Ingvild Kjerkol.