Reviderejuvvon nationálabušeahtta:
Eanet birrajándor fuolahussajit
Ođas | Almmustahtton: 12.05.2023 | Dearvvašvuođa- ja fuolahusdepartemeanta
Sihkkarastin dihtii oadjebas ja buori dearvvašvuođa- ja fuolahusfálaldaga vuorrasiidda, evttoha ráđđehus nannet birrajándor fuolahussajiid doarjagiid juolludusrámma 2 miljárdda ruvnnuin. Ráđđehus evttoha maiddái viiddidit gielddasuorggi organisašuvnna KS Tørn-prošeavtta nationála prográmman.
– Vuorrasiid lohku lassána mearkkašahtti olu boahttevaš jagiid. Vuorrasat geat eai birge šat ruovttus, galget leat oadjebasat das ahte searvevuohta veahkeha sin, dadjá dearvvašvuođa- ja fuolahusministtar Ingvild Kjerkol.
– Lean ilus go mii sáhttit láhčit dili sullii 1000 ođđa fuolahussadjái. Ovdal geasi áigut maiddái bidjat ovdan ollislaš vuorrasiidođastusa. Okta dán váldoulbmiliin lea sihkkarastit vuorrasiidda buoret orrunvugiid mat leat eanet guoddevaččat.
Nannejuvvon juolludusrámma
2023:s leat ollugat jearahan investerendoarjaga birrajándor fuolahussajiide.
Ráđđehusa evttohus nannet juolludusrámma vel 2 miljárdda ruvnnuin birrajándor fuolahussajiide galgá addit vejolašvuođa lágidit sullii 1000 ođđa saji.
Investerendoarjaga máksinprofiilla vuođul mearkkaša evttohus ahte juolludus lassána 200 miljovnna ruvnnuin 2023:s.
Viiddida Tørn-prošeavtta
– Dearvvašvuođabargiidkommišuvdna lea čielggas das ahte boahttevuođas gártet uhcit fágaolbmot juohke divššohasa nammii. De mii fertet nuppástuhttit ja bargagoahtit ođđa vugiiguin, muitala dearvvašvuođa- ja fuolahusministtar Ingvild Kjerkol.
– Mii fertet fuolahit ahte fágaolbmot besset geavahit iežaset gelbbolašvuođa buoremus lági mielde, ja ahte mis lea rivttes bargojuohku ja ahte mii láhčit dilálašvuođaid ollesáigekultuvrii. Tørn-prošeakta váikkuha dasa. Danne mii evttohit viiddidit geahččaleami ja dahkat dan nationála ortnegin.
Galgá váikkuhit dasa ahte bálvalusat šaddet eanet guoddevaččat
Tørn-prošeakta geahččaladdá ođđa bargo- ja organisašuvdnavugiid gielddalaš dearvvašvuođa- ja fuolahusbálvalusas.
Geahččaleamit galget váikkuhit dasa ahte bálvalusat šaddet eanet guoddevaččat dainna lágiin ahte lasihit olleáiggebargiid logu ja bargiid logu geain lea dearvvašvuođafágalaš gelbbolašvuohta.
– Mii diehtit ahte oadjebas ja buorit bargoeavttut leat mearrideaddjin dasa ahte fágaolbmot háliidit bargat min oktasaš dearvvašvuođa- ja fuolahusbálvalusas. Danne leat mii maiddái bidjan ovdan sierra ceahkkálastinplána ollesáiggi ja buori bargoveaga várás fuolahusbálvalusas man mii dál leat čuovvuleamen, dadjá Kjerkol.