Stáhtabušeahtta 2021:

Eanet ulbmillaš BSU-ortnet

Ráđđehus evttoha ahte viessoruhtaseastinortnet nuoraid várás (BSU-seastin) heivehuvvo nuoraide geat eai eaiggáduša viesu. Ráđđehus evttoha seammás lasihit jahkásaš seastinsupmi 27 500 ruvdnui, vai sii besset eanet seastit geat man nu láhkai eai beasa viessomárkanii.

– BSU-seastinortnega ulbmil lea nuoraid veahkehit bargomárkanii. Almmatge oaidnit ahte sullii juohká goalmmát BSU-seasti eaiggáduššá viesu. Dál mii rievdadat ortnega ja heivehat dan nuoraide geain ii leat viessu, dadjá ruhtadanministtar Jan Tore Sanner (O). 

Ráđđehus evttoha ahte sii geat juo eaiggáduššet viesu, eai galgga šat oažžut vearrogessosa BSU-ortnega bokte. Dat guoská maid sidjiide geat eaiggáduššet ovtta oasi viesus. Jos viesu vuovdá ja iige oastte ođđa, de lea vejolaš seastit ja oažžut vearrogessosa. Ráđđehus evttoha maid lasihit BSU jahkásaš seastinsupmi  25 000 ruvnnus 27 500 ruvdnui.

– Lasihuvvon jahkásaš seastinsupmi dahká álkibun ávkkástallat olles seastinrámma ovdal go viesu oastá, deattuha ruhtadanministtar Jan Tore Sanner (O).

Sii geat eai oaččo vearrogessosa ođđa njuolggadusaid mielde, sáhttet almmatge diktit seastinkonto leat lihkatkeahttá ja joatkit seastima, jos báŋkkus lea dakkár fálaldat. BSU-seastinortnegis lea dábálaš buorre reantu ja danne gánnáha bisuhit seastinkonto jos vel ii oaččo ge vearrogessosa.

BSU-vearrogeasus addojuvvo gitta dan jahkái go deavdá 33 jagi. BSU-seastinruđaid sáhttá geavahit oastit viesu dahje máksit viessovealggi. 2021 rájes lea vejolaš seastit eanemus 27 500 ruvnnu jahkásaččat gitta 300 000 ruvnnu rádjai (lassin reanttuid) oktiibuot. Jagi 2013 rájes lea seastinsupmi lassánan 20 000 ruvnnu rájes gitta 150 000 ruvnnu rádjái jahkásaččat. Jos 2021:s seastá eanemus vejolaš supmi, de dahke vearrogeasus 5 500 ruvnnu.

Loga eanet Prop. 1 LS (2020–2021) Skatter, avgifter og toll 2021, čuokkis 3.2.

Loga maid Gielda- ja ođasmahttindepartemeantta preassadieđáhusa viessososiála doaimmaid birra gos maiddái Viessobáŋkku lasihuvvon loatnarámma namuhuvvo.