Historjjálaš arkiiva

Eanadoallošiehtadus 2016:

Eanadoallošiehtadus addá buorre vuođu nannet biebmobuvttadeami

Historjjálaš arkiiva

Almmustahttináigodat Solberga ráđđehus

Almmustahtti: Eanandoallo- ja biebmodepartemeanta

Eanadoallo- ja biebmoministtar Jon Georg Dale (Ob) lea duhtavaš go Norgga Boanddaidsearvi ja stáhta otne dohkkehedje eanadoallošiehtadusa.

 Norgga ekonomiija lea váttis dilis muhto Norgga Boanddaidsearvi váldá ovddasvástádusa ja sohpe eanadoallošiehtadusa stáhtain, cealká eanadoallo- ja biebmoministtar Jon Georg Dale.  

 Šiehtadus addá eanadollui vejolašvuođa lasihit sisaboađu 3,1 proseanttain boahtte jagi. Dat láhčá dili lasihit norgga biebmobuvttadeami, olles eanadoalus, smávva ja stuorra doaluin miehtá riikka – nugo Stuoradiggi lea mearridan ja nugo geavaheaddjit dárbbašit, dadjá Dale. 

Otná preassakonfereanssas, gurutravddas: Norgga Boanddaidsearvvi jođiheaddji ja eanadoalu šiehtadallanjođiheaddji, Lars Petter Bartnes, eanadoallo- ja biebmoministtar Jon Georg Dale ja stáhta šiehtadallanjođiheaddji, departemeantaráđđi Leif Forsell.
Otná preassakonfereanssas, gurutravddas: Norgga Boanddaidsearvvi jođiheaddji ja eanadoalu šiehtadallanjođiheaddji, Lars Petter Bartnes, eanadoallo- ja biebmoministtar Jon Georg Dale ja stáhta šiehtadallanjođiheaddji, departemeantaráđđi Leif Forsell. Govva: Eanadoallo- ja biebmodepartemeanta

Eanadoalu gáibádus ovddiduvvui cuoŋománu 25.b. ja stáhta ovddidii iežas fálaldaga eanadoallošiehtadussii miessemánu 4.b. Miessemánu, sotnabeaivve 15.b. dohkkeheigga stáhta ja Norgga Boanddaidsearvi eanadoallošiehtadusa.

Šiehtadusrámma lea 350 miljovnna kruvnnu. Mihttohattit lassánit 190 miljovnna kruvnnuin, ja bušeahttadoarjja lassána 100 miljovnna kruvnnuin. 

Geahča video preassakonfereanssas:

Eanet investeremiidda ja bargiidháhkamii

575 miljovnna kruvnnu várrejuvvo eanadoallo investerendoarjjaortnegii.

– Norgga eanadollui lea stuora beroštupmi ja investerendáhtu. Dan dihte lea dehálaš, háhkat eanet olbmuid ealáhussii, vai boanddat besset ođasmahttit ja viidáset ovddidit šibitdáluset, dadjá eanadoallo- ja biebmoministtar Jon Georg Dale.

Šiehtadus joatká maŋimuš guokte jagi eanadoallošiehtadusa rievdadusaid mat leat addán buriid vejolašvuođaid sidjiide geat háliidit buvttadit ollu norgga borramuša.

– Stuoradikki 2014 eanadoallošiehtadusa vuođul ja Stáhta ja Norgga Boanddaidsearvvi 2015 šiehtadusa vuođul, leat ollugat beassan čađahit stuorra investeremiid maid dárbbašit šibitdoalus. Dat lea leamaš áibbas dárbbašlaš sihkkarastit ahte sii geat áiddo leat investeren ja váldán velggiid eai vásit ahte sin doaibmaeavttut rievdaduvvojit, dadjá eanadoallo- ja biebmoministtar Jon Georg Dale. 

Lasihit buvttadeami Norgga rásseeatnamiin

Doarjjavuogádaga rievdadusat leat váikkuhan dasa ahte sávzadoallu lea hirbmadit ovdánan 2014 rájes. Lábbábiergu buvttaduvvui ovdal uhcán Norggas, muhto dál lea dilli áibbas nuppe láhkai go dál mii ieža Norggas buvttadat lábbábierggu.   

– Seammá guoská šibitbirgui. Maiddái bálkkašat bierggu mas lea buorre kvalitehta. Dat movttiidahttá eanet buvttadit, ja áinnas máŋggalágan kvalitehtabierggu geavaheddjiid várás, oaivvilda Dale.   

Norga lea rásseriika ja sávzzat ja gusat sáhttet daid geavahit guohtumii. Šiehtadusas lasihat guohtundoarjaga sávzzaid ja gusaid várás vai norgga rásseeatnamat geavahuvvojit vel buorebut. Dat maid nanne boaittobealeanadoalu.

Mii maid heivehat doarjjavuogádaga vai dat buorebut movttiidahttá gilvit ja buvttadit gortniid ja šattuid šattolaš gordneguovlluin, ja eará riikkaosiin gos lea vejolaš fas suinniid ja šibitbuktagiid.  

– Dat buorida gilvalannávccaid boaittobealeanadoalus, ja addá vejolašvuođaid lasihit  biebmu mii lea buvttaduvvon norgga resurssain, dadjá Dale.

– Šiehtadus ii sirdde kruvnnu ge smávva šibitdáluin stuorit šibitdáluide, deattuha Dale.  

Luovosdoaibmagáibádus maŋiduvvo

Stuoradiggi lea ovdal mearridan ahte buot mielkegusat ovdal 2024 galget návehis beassat vázzit luovos ja eaige biddjot hiŋgaliidda. Dan sivas go eanaš mielkebuvttadeapmi ain čađahuvvo dakkár návehiin gos gusat leat hiŋgaliin, de šaddá hirbmat váttis čađahit nuppástusaid ovdal 2024. Luovosdoaibmagáibádusa maŋideapmi 2034 rádjai lea dehálaš eaktu šiehtadusas.  

– Luovosdoaibmaheiveheapmi lea hui hástaleaddji smávva ja gaskasturrosaš oapmedáluide. Dál go gáibádus maŋiduvvo 10 jagiin, de buoridat vejolašvuođaid bisuhit sihke smávva ja stuorra šibitdáluid miehtá riikka, loahpaha eanadoallo- ja biebmoministtar Jon Georg Dale.

Eanadoallošiehtadus ovddiduvvo proposišuvdnan Stuoradiggái, ja meannuduvvo doppe ovdal geasi.