Historjjálaš arkiiva

Ellinor Guttorm Utsi – Dánjagáš bohccobiergogaskkusteaddji 2015 vuoiti

Historjjálaš arkiiva

Almmustahttináigodat Solberga ráđđehus

Almmustahtti: Eanandoallo- ja biebmodepartemeanta

Deatnolaš Ellinor Guttorm Utsi oaččui “Dánjagáš bohccobiergogaskkusteaddji 2015”-bálkkašumi bohccobiergoealáhussuorggi jahkásaš čoahkkimis Romssas njukčamánu 7.b. Davvi Siida-bearašfitnodaga bokte lea Ellinor ráhkadan ollislaš mátkeealáhusbuktaga man vuođđun leat luondu, sámi kultuvra ja sámi biebmu.

– Ellinor Guttorm Utsi ánssáša vuoitit, ja son oažžu ge bálkkašumi barggu ovddas maid son ja bearaš leat dahkan, dadjá eanandoallo- ja biebmoministtar Jon Georg Dale. – Davvi Siida-fitnodat lea huksejuvvon iežaset nana máhtuin ja vásáhusaiguin ja fállet kvalitehtabuktagiid maid márkan jearaha. Mun sávan bálkkašupmi movttiidahttá ain ovdánahttit fitnodaga, dadjá Jon Georg Dale. 

Rámis bálkkašupmevuoiti oktan juryin, gurut bealde: Eanandoallo- ja biebmodepartemeantta ekspedišuvdnahoavda Anne Marie Glosli, vuoiti Ellinor Guttorm Utsi, Norgga Boazosápmelaččaid Riikkasearvvi jođiheaddji Ellinor Jåma ja Bohccobierggu márkanastinlávdegotti jođiheaddji John Anders Lifjell.
Rámis bálkkašupmevuoiti oktan juryin, gurut bealde: Eanandoallo- ja biebmodepartemeantta ekspedišuvdnahoavda Anne Marie Glosli, vuoiti Ellinor Guttorm Utsi, Norgga Boazosápmelaččaid Riikkasearvvi jođiheaddji Ellinor Jåma ja Bohccobierggu márkanastinlávdegotti jođiheaddji John Anders Lifjell. Govva: Eanandoallo- ja biebmodepartemeanta

Ásahan eanet doaimmaid main vuolggasadji lea iežas boazodoallu

Ellinor Guttorm Utsi lea áŋgirvuođain ja sávrivuođain lihkostuvvan ásahit máŋggaid doaimmaid main vuolggasadji lea iežas boazodoallu. Buot bearašlahtut barget boazodoaluin ja turisttaiguin, ja fállet iežaset máhtu sámi kultuvrras ja boazodoalus. Utsi-bearraša váldoealáhus lea boazodoallu, ja sii čuvvot ealu dálveeatnamiin Deanus Čorgasii go geassi lahkona. Dasa lassin lea Ellinor dovddus duojár.

Davvi Siida

Davvi Siida lea áiggi mielde ovdánahtton márkana vuođul. Sii leat aktiivvalaččat bargan stuorát mátkeealáhusaktevrraid ektui, ee. A Taste of Lapland ja Hurtigruten, ja sii leat olahan olu olbmuide. Davvi Siida fállá autenttalaš vásáhusaid lávus doaimmaiguin, idjademiin ja buriin biepmuin.

Jury ágga

Ákkastis deattuhii jury Ellinora barggu fokuseret ja gaskkustit boazodoalu positiivvalaš beliid, ja su barggu oažžut ovdan bierggu historjjá ja nu maiddái loktet nissonolbmuid ja almmáiolbmuid, duoddara sáŋgáriid, geat čoavdemeahttumit assosierejuvvojit bibmui man vuođđun lea norgga bohccobiergu. Ellinor ja bearaš eallá boazodoaluin ja doaimmain mat leat čadnon iežaset boazodollui. Konseapta lea autenttalaš, ovttageardán, muhto hirbmat duohta ja jáhkehahtti. Ellinor lea leamaš ja lea ain ovdavázzinnisu boazodoalus, su doaimmas deattuhuvvo su bargu loktet boazodoallonissoniid. Iežas duddjoma bokte son čájeha ráhkesvuođa iežas kultuvrii ja álbmogii ja lea nu sámi kulturárbbi vállju hálddašeaddji.

Jurys ledje guovtti šiehtadallandelegašuvnna jođiheaddjit geat deaivvadit jahkásaš boazodoallošiehtadusa šiehtadallamiin, Anne Marie Glosli (EBB’ ekspedišuvdnahoavda) ja Ellinor Marita Jåma (NBR-jođiheaddji). Dasa lassin lea maiddái Márkanastinlávdegotti jođiheaddji John Anders Lifjell leamaš jurymiellahttun.

Bálkkašumi ásaheapmi ja ulbmil

Bohccobierggu márkanastinlávdegoddi geige jahkásaččat “Dánjagáš bohccobiergogaskkusteaddji”-bálkkašumi. “Dánjagáš bohccobiergogaskkusteaddji”-bálkkašumi ulbmilin lea loktet ja rámidit ovttaskasolbmuid, ásahusaid dahje fitnodagaid geat aktiivvalaččat ja jeavddalaš gaskkusteami bokte leat leamaš mielde nannemin bohccobierggu positiivvalaš beaggima. Bálkkašupmi geigejuvvui vuosttaš geardde bohccobiergodoaluin Mathallenis Sámi álbmotbeaivvi guovvamánu 6.b. 2015, ja dan oaččui Plassje fitnodat Fjellvilt.

Jurys sáhtii válljet viđa buori kandidáhta gaskkas “Dánjagáš bohccobiergogaskkusteaddjái 2015”. Árvvoštallaneaktun válljet “Dánjagáš bohccobiergogaskkusteaddji” lea ahte kandidáhtta lea juogo aktiivvalaččat ja jeavddalaččat gaskkustan biepmuid mat leat ráhkaduvvon bohccobierggus dahje bohccobiergobuktagiin, dahje gaskkustan bohccobierggu eará positiivvalaš beliid mat čuvvot Márkanastinlávdegotti árvvuid: 

  • Duoddara sáŋgár
  • Veahá lagat luonddu
  • Dimis, njálggat ja dearvvašlaš
  • Biebmu ovttas buriid olbmuiguin 
Ellinor Guttorm Utsi lei okta čájeheaddjiin Davvi-Norgga čájáhusas Grüne Woches 2015:s.
Ellinor Guttorm Utsi lei okta čájeheaddjiin Davvi-Norgga čájáhusas Grüne Woches 2015:s. Govva: Vidar Alfarnes