Nationálabušeahta 2019:
Rievdaduvvon vearronjuolggadusat tipsaruđaide/doaibmaaddosiidda
Historjjálaš arkiiva
Almmustahttináigodat Solberga ráđđehus
Almmustahtti: Ruhtadandepartemeanta
Preassadieđáhus | Nr: 41/2018 | Almmustahtton: 08.10.2018
– Ráđđehus oaivvilda ahte buot bargiin berre leat seamma vuoigatvuohta oažžut buohcanruđaid ja álbmotoaju penšuvnna beroškeahttá das leat go sii ožžon máksojuvvot tipsaruđaid/doaibmaaddosiid dahje dábálaš bálkká. Dan geažil mii evttohat nuppástuhttit vearronjuolggadusaid mat gusket tipsaruđaide, dadjá ruhtadanministtar Siv Jensen (OvB).
Ráđđehus áigu geatnegahttit bargoaddiid raporteret jos bargit ožžot tipsaruđaid. Sii fertejit maid tipsaruđaid ovddas geassit ovdagessosa ja máksit bargoaddidivada seamma láhkai go dábálaš bálkká ovddas.
Dálá njuolggadusaid mielde galgá máksit vearu tipsaruđaid ovddas, muhto geavadis dat eai vearuhuvvo. Sivvan dasa lea ahte bargoaddit eai leat geatnegahtton raporteret tipsaruđaid/doaibmaaddosiid maid bargit ožžot barggu oktavuođas.
– Go tipsaruđat/doaibmaaddosat meannuduvvojit seamma láhkai go bálkkát muđui, de oažžut mii eanet ođđaáigásaš ja čorgadeabbo bargoeallima, ja mii maid nannet bargiid vuoigatvuođaid, dadjá ruhtadanministtar.
Ođđa raporterenrutiinnat sáhttet gal buktit praktihkalaš hástalusaid bargoaddiide, muhto ođđajagi rájes doaibmagohtet ođđa girjedoallonjuolggadusat maid vuođul bargoaddi goit ge livčče geatnegahtton almmuhit tipsaruđaid maid bargit ožžot. Ráđđehus oaivvilda dan geažil ahte dál lea rivttes áigi rievdadusaide.
– Go bargoaddi raportere tipsaruđaid/doaibmaaddosiid, de dat mielddisbuktá ahte tietnasat meannuduvvojit ovttaláhkai iešguđet fidnosurggiid gaskka. Ovttaskas bargoolbmui šaddá maid álkibun doahttalit vearromáksingeatnegasvuođas, dadjá ruhtadanministtar Siv Jensen (OvB).