Erenoamáš roassodoarjja lea sohppojuvvon

Eanadoallo- ja biebmodepartemeanta ja Norgga Boazosápmelaččaid Riikkasearvi (NBR) leat odne soahpan erenoamáš doarjjaortnega man ulbmil lea geahpedit ekonomalaš vahágiid duođalaš guohtunroasu geažil maid boazodoallu vásihii 2020:s.

Buoridan dihte ekonomalaš dili heajos guohtumiid geažil, lea Eanadoallo- ja biebmodepartemeanta ja NBR soahpan ásahit 30.000,- sturrosaš erenoamáš roassodoarjaga mii galgá máksot juohke siiddaoassái, ja joatkit gustovaš miessedoarjjaortnega šiehtadusjagi 2020/2021.

Erenoamáš ortnet ásahuvvo gustovaš šiehtadusrámmaid siskkobealde ja 2020/2021 Boazodoallošiehtadusa ulbmiliid mielde, maid Stuoradiggi lea dohkkehan.

– Lean hui duhtavaš go dál leat soahpan erenoamáš buhtadanortnega geahpedan dihte ekonomalaš vahágiid ealáhusas. Ortnet galgá doaibmagoahtit johtilit, vai boazoeaiggádat besset ohcat erenoamáš roassodoarjaga ja oažžut doarjaga máksot  oanehis áiggis, dadjá eanadoallo- ja biebmoministtar Olaug Bollestad.

Norgga boazoeaiggádat vásihedje 2020 dálvvi ja giđa duođalaš guohtunroasu váttis guohtundili geažil. Ráđđehus lea veahkehan boazodoalu vai nagoda hálddašit guohtunroasu ja lea ge boazodoallošiehtadussii juolludan erenoamáš doarjagiid oktiibuot 30 miljovnna kruvnno ovddas giđđat 2020. 

Vaikke vel leat ge ásahan doaibmabijuid geahpedan dihte boazovahágiid dálve- ja giđđaguohtuneatnamiin, de leat heajos guohtumat sakka váikkuhan buvttadeapmái, ja boazoealáhusa ekonomiijai. Miesselohku lea sakka njiedjan, ja njuovvanlohku jagi 2020 lea  40 proseantta vuollelis go 2019:s.  

– Mun lean álo deattuhan ahte guohtunroassu galgá hálddašuvvot struktuvrraid siskkobealde mat gávdnojit. Mis lea buorre ja konstruktiiva ovttasbargu NBR:n. Mu mielas lea dehálaš ahte mii boahtteáiggis maid ovttas gávdnat doaibmabijuid mat veahkehit min ain buorebut dustet ja hálddašit guohtunroasuid, dadjá Bollestad.