Historjjálaš arkiiva

Soahpan 136,1 miljovnna kruvnnu ođđa boazodoallošiehtadussii

Historjjálaš arkiiva

Almmustahttináigodat Solberga ráđđehus

Almmustahtti: Eanandoallo- ja biebmodepartemeanta

Norgga boazosápmelaččaid Riikkasearvi (NBR) ja Stáhta leat maŋŋebárgga eahkeda soahpan ođđa boazodoallošiehtadusa áigodahkii 01.07.2019 – 30.06.2020. Boazodoallošiehtadusa 2019/2010 ekonomalaš rámma lea 136,1 miljovnna kruvnnu. Lassáneapmi lea 13 miljovnna kruvnnu diimmá šiehtadusa ektui.

-Dán jagi lea šiehtaduvvon erenoamáš buorre boazodoallošiehtadus. Šiehtadusa vuođul galgat ain nannet ja ovdánahttit boazodoalloealáhusa márkanguvllot ealáhussan mii lea gánnáhahtti guhkitáiggi badjel.  Dán jagi boazodoallošiehtadusas vuoruhat sin geain boazodoallu lea váldofitnodat, cealká eanadoallo- ja biebmoministtar Olaug Bollestad.  

Boazodoallošiehtadusas jotkojuvvojit dat njuolggodoarjjaortnegat mat láhčet dili einnostahtti ja dássedis ealáhussii. Dan lassin ásahuvvo doarjjaortnet nissonolbmuide geain lea siidaoassi. Šiehtadusas vuoruhuvvojit maid doarjjaortnegat ásahan dihte lassiealáhusaid. Ovdánahttinprográmma jotkojuvvo, ja oahppo- ja fuolahanbálvalusat boazodoalus šaddet bissovaš ortnegin. Liigedienas lassiealáhusaid bokte lea dehálaš bearašvuđot boazodoalu seailluheames ja ovdánahttimis.

Boazodoallošiehtadusas 2019/2010 nannejuvvojit maid čálgoortnegat. Árrapenšuvnna ruhtamearit lasihuvvojit mealgat. Ásahuvvo maid sierra geahččalanprošeakta buoridan dihte dearvvašvuođa, biras ja sihkkarvuođa suorggi boazodoalus. Orohatdoarjja lassána 10 000 kruvnnuin.

-Árrapenšuvnna doarjjalassáneapmi álkidahttá buolvamolsuma boazodoalus. Dat lea dehálaš strukturdoaibma. Dasa lassin lea dearvvašvuohta, biras ja sihkkarvuohta dehálaš suorgi maid lea dárbu nannet, geahpedan dihte lihkohisvuođaid ealáhusas, loahpaha eanadoallo- ja biebmoministtar Olaug Bollestad.

Norgga Boazosápmelaččaid Riikkasearvi (NBR) ja Stáhta leat soahpan ođđa boazodoallošiehtadusa. Stáhta šiehtadallanlávdegotti jođiheaddji Anne Mari Glosli ja Norgga Boazosápmelaččaid Riikkasearvvi (NBR) jođiheaddji Ellinor Marita Jåma
Norgga Boazosápmelaččaid Riikkasearvi (NBR) ja Stáhta leat soahpan ođđa boazodoallošiehtadusa. Stáhta šiehtadallanlávdegotti jođiheaddji Anne Mari Glosli ja Norgga Boazosápmelaččaid Riikkasearvvi (NBR) jođiheaddji Ellinor Marita Jåma Govva: Eanadoallo- ja biebmodepartemeanta