Ovttaoaivilis 2021/2022 boazodoallošiehtadusa hárrái

Šiehtadalliid váldovuoruheamit 2021/2022 boazodoallošiehtadusas leat boazodoalu areálat, roassogearggusvuohta ja doaimmat, maiguin veahkehit Norgga badjeolbmuid, geat eai beasa guođohit eatnamiinniset Ruoŧa bealde. Boazodoalu njuolggodoarjagiid doalahit, ja lasihit buvttadanvuoittu máksomeari. Šiehtadusa oassebealit leat maid lasihan Boazodoalu ovddidanfoandda friija doarjagiid. Šiehtadusa vuoruhemiiguin nannejit ealáhusa rámmaeavttuid čielgasit.

• Loga – Šiehtadus, loahppabeavdegirji
• Loga – Boazodoalu váldošiehtadus

– Lean hui duhtavaš, go dál leat dahkan ođđa šiehtadusa Norgga boazosápmelaččaid riikkaservviin, dadjá eanandoallo- ja biebmoministtar Olaug Bollestad. Munnje eanandoallo- ja biebmoministtarin lea mávssolaš sihkkarastit boazodollui buriid rámmaeavttuid, ja dan bokte ovddidit boazodoalu ceavzilin.

Oassebealit leat boahtán ovtta oaivilii máŋgga doaimma hárrái, maiguin nannejit boazodoalu barggu areálaid ovdii. Váldodoaibman ásahit golmma jagi pilohttaprošeaktan areálaáššiid neavvunbálvalusa NRL olis. Stivrenjoavku bargagoahtá neavvunbálvalusa ásahemiin 2021. Šiehtadusa oassebealit leat maid ovddidan, ahte ráhkaduvvojit bagadusat orohagaid bargui areálaáššiiguin, ja orohatplánat, maid orohagat sáhttet geavahit iežaset plánaid vuođđun.

– Vealtameahttun areálaid sihkkarastin boahtte áiggi buvttadeapmái ja gánneheapmái lea okta boazodoalu stuorámus hástalusain. Lean danin ereliiggán duhtavaš dainna, mo mii šiehtadusa bokte nannet ealáhusa barggu areálaáššiiguin. Háliidan erenoamážit namuhit areálaáššiid neavvunbálvalusa golmma jagi pilohttaprošeavtta, maid ásahit NRL olis. Dan bokte ovddidit nana gealbo- ja neavvunbirrasa, mas lea stuorra ávki ealáhussii areálaáššiiguin, dadjá eanandoallo- ja biebmoministtar Olaug Bollestad. 

Šiehtadusa oassebeliin lea leamaš 2020 guohtonroassu varas muittus šiehtadallamiin. Šiehtadusa oassebealit leat buori muddui čuvvon dan bargojoavkku ávžžuhusaid, mii lea geahčadan mo áššiid meannudedje 2020 guohtonroasu oktavuođas. Guohtonroasu čuovvumušaid geažil, ja go maiddái 2021 dáidet gártat njuovvat vehá unnit go ovdal, de leat šiehtadusa oassebealit lasihan buvttadanvuoittu máksomeari 36 proseanttas 39 prosentii.

Šiehtadusa oassebealit leat maid vuoruhan nannet boazodoalu roassogearggusvuođa. Roassogearggusvuođafondii lasihit 4,5 miljovnna kruvnno 2021/2022, ja ráhkadit gearggusvuođaplánaid, maid orohagat sáhttet váldit atnui. NBR oažžu bargun lágidit ealáhussii gearggusvuođasemináraid ja kurssaid lassibiebmama birra. Ásahit maid pilohttaprošeavtta, man olis ovddidit bohccuid dearvvašvuođabálvalusa. Šiehtadusa oassebealit árvvoštallet ovttas viidáseappot mo dakkár dearvvašvuođabálvalusa lágidit.

– 2020 dálvvi ja giđa goahtonroassu lei lossat boazodollui. Doaimmat, maid šiehtadusain leat ovddidan, leat mávssolaččat dasa, ahte boazodoalus ja eiseválddiid beales leat buorebut ráhkkanan jos boahtteáiggis fas šaddet goahtonroasut, dadjá Olaug Bollestad.

Šiehtadusoassebealit leat ovtta oaivilis dan hárrái, ahte lea dárbu vuoruhit daid Norgga beale badjeolbmuid, geat eai beasa guođohit bohccuideaset Ruoŧa beale guohtumiinniset. Dan oktavuođas juolludit earret eará stuorát biebmandoarjaga ja ásahit ortnegiid juridihkalaš doarjaga várás ja Ruoŧa beale guohtumiid geavaheami historjjálaš kártemii.

– Go šiehtadus Ruoŧain lea váilon guhkes áigge, de dat leat dagahan stuorra hástalusaid Norgga boazodollui. Lean duhtavaš go šiehtadusoassebealit leat vuoruhan dán nu nannosit jagi šiehtadallamiin. Doaimmaiguin, maid dál álggahit, doarjut Norgga badjeolbmuid ja geahpedit sin dili, dadjá Olaug Bollestad.