Aktiver Javascript i din nettleser for en bedre opplevelse på regjeringen.no

Evttoha viiddiduvvon boarásmuvvanáigemeriid

Justiisa- ja gearggusvuođadepartemeanta evttoha viiddidit boarásmuvvanáigemeriid veahkaváldimiin mánáid vuostá. Dat lea okta dain rievdadusevttohusain ráŋggáštuslágas mii odne sáddejuvvo gulaskuddamii.

Gulaskuddannotáhtas evttohuvvo viiddidit boarásmuvvanáigemeriid veahkaváldimiin mánáid vuostá ja vissis eará láhkarihkkumiin, dannego oanehit boarásmuvvanáigemeriin ođđa ráŋggáštuslágas sáhttet leamaš unohis váikkuhusat. Dákkár láhkarihkkumiin sáhttet leat dagut maid son gii lea vásihan dan ii nákce muitalit ovdal go lea gollan muhtin áigi. Dálá boarásmuvvanáigemearit sáhttet dan dihte dahkat váttisin almmustahttit dákkár daguid ovdal go ráŋggáštusovddasvástádus lea boarásmuvvan.

– Ođđa ráŋggáštusláhka lea boađus stuora barggus mii lea bistán máŋga jagi, ja ođđa láhkii molson lea eanasmuddui lihkostuvvan. Ráŋggáštusláhka lea okta dain deaŧaleamos lágain riektestáhtas, ja dat váikkuha máŋgga olbmo eallima, dadjá justiisa-, sisafárren- ja gearggusvuođaministtar Tor Mikkel Wara (OvB).

– Dat lea dan dihte vuoruhuvvon bargu departementii čađaáigge fuolahit ahte lágas lea alla kvalitehta, nu ahte balánsa gaskkal riektesihkarvuođa ja oadjebasvuođa fuolahuvvo buoremus lági mielde, dadjá vel Wara.

 Gulaskuddan lea ođđa ráŋggáštuslága čuovvoleapmi, mii bidjui fápmui golggotmánu 1. beaivvi 2015. Ođđa ráŋggáštuslága fápmudeapmi mielddisbuvttii dárbbu máŋgga láhkarievdadusaide ráŋggáštuslágas ja eará lágain. Ii lean goitge vejolaš čuovvolit buot fápmudeami oktavuođas. Maŋemus jagiin leat mii maiddái ožžon vásáhusaid lágain, maid vuođul sáhttá árvvoštallat muhtin láhkarievdadusaid.

Viidáseappot evttoha gulaskuddannotáhta earret eará rievdadusaid maid ulbmil lea buoridit vejolašvuođa ráŋggáštit korrupšuvnna mas leat čanastagat olgoriikii.

Høring - Forslag til endringer i straffeloven mv. (oppfølgning etter ikraftsettelsen av straffeloven)

Bajás