Evttohus sáddejuvvon gulaskuddamii addit bággosáhku mohtorfievrruide main váilu dáhkádus

Ruhtadandepartemeanta lea odne sádden evttohusa gulaskuddamii dan birra ahte Johtolatdáhkádussearvi (JDS) sáhttá addit bággosáhku mohtorfievroeaiggádiidda geain ii leat ovddasvástádusdáhkádus. -Ortnet boahtá jáhkkimis unnidit logu mohtorfievrruin main váilot dáhkádusat. Dat sáhttá mielddisbuktit unnibut lihkohisvuođaid ja vahágiid. Dasa lassin eai dárbbaš biilaeaiggádat geat čuvvot lágaid searvat rehkegii go mohtorfievrrut dáhkádusaid haga gártet lihkohisvuođaide, dadjá ruhtadanministtar Siv Jensen.

Ollugiin geat eaiggádit biillaid váilu dáhkádus, vaikko dat leat láhkageatnegahtton geatnegasvuohta. Odne leat 135 432 mohtorfievrru main váilu dáhkádus. Dat dahká 3,4 proseantta Norgga mohtorfievrruin. Ruhtadandepartemeanta meroštallá ahte JDS-ortnet boahtá unnidit mohtorfievrruid logu main váilu dáhkádus ruoŧa dássái. Ruoŧas lea vástideaddji ortnet go maid Norga evttoha váldit atnui, doppe lea mohtorfievrruin 1 proseanta main váilu dáhkádus.

JDS-ortnet mielddisbuktá ahte Johtolatdáhkádussearvi (JDS) sáhttá gáibidit bággosáhku eaiggádiin geain mohtorfievrrus váilu dáhkádus. Personbiilii šaddá beaivesáhkku birrasiid 150 ruvnno ja dat addo juohke jándora ovddas go mohtorfievrrus váilu dáhkádus. Dát lea mearkkašahtti divraseappot go dáhkidit mohtorfievrru dábálaš vuogi mielde.

Bággosáhku sisaboađut galget adnot gokčat vahágiid maid eai dáhkiduvvon mohtorfievrrut dagahit ja vahágiid maid eai identifiserejuvvon mohtorfievrrut dagahit. Golut dása dahket birrasiid 110-120 miljovnna ruvnno jahkái. Dát lea golut maid odne dáhkádusfitnodagat fertejit gokčat ja eahpenjuolga danne nai buot dáhkádusoastit geat čuvvot lágaid.

Departemeanta ásaha dili nu ahte ortnet sáhttá sisafievrreduvvot ođđajagimánu 1.b.2018:s, seammás go jahkedivat rievdá johtolatdáhkádusdivan. JDS-ortnet vuordimis unnida stáhta sisaboahtovahágiid birrasiid 150 miljovnna ruvnnuin go rievdá ja šaddá johtolatdáhkádusdivadin.

JDS-ortnet guoská buohkaide geat eai deavdde láhkavuođuštuvvon dáhkádusgeatnegasvuođa. Dat sáhttet leat eaiggádat buot mállet registrerejuvvon mohtorfievrruin - personbiillaid rájes mopedaid ja muohtaskohteriid rádjái.

 

Fákta Johtolatdáhkádussearvvi ja JDS-ortnega birra:
JDS lea ovttasbargoorgána dáhkádusfitnodagaide mat barget johtolatsihkarvuođain Norggas. Searvi buhtada vahágiid maid amas ja eai dáhkiduvvon mohtorfievrrut dagahit ja galgá muđui bargat dáhkádusgažaldagaiguin riikkaidgaskasaš mohtorfievrojohtolaga oktavuođas.

Geatnegahtton dáhkádusgeatnegasvuohta galgá sihkkarastit buhtadusa dasa gii gillá vahága maid goalmmát olmmoš lea dagahan, beroškeahttá das makkár goalmmát olbmo ekonomalaš návccat leat vahátáigemuttus. Lasihan dihte dán oadjebasvuođa vel eanet, de lea huksejuvvon dáhkádusortnet mii JDS bokte sihkkarastá goalmmátolbmui buhtadusa vahágis maid amas, eai dáhkiduvvon dahje olgoriikkalaš mohtorfievrrut dagahit, mii lea guovddáš buhtadusorgána vahágiidda maid mohtorfievrrut dagahit.

Evttohusa mielde galgá bággosáhtu dássái biddjot vuođđun divraseamos fállojuvvon dáhkádushaddi, masa lasihuvvo beaivevuđot johtolatsihkarvuođadivat, sisagáibidangolut, ja 2,5 proseantta lasáhus divraseamos fállojuvvon dáhkádushaddái. Personbiilii šaddá dalle beaivesáhkku birrasiid 150 ruvnno.

Evttohusas lea maiddái ollu beavttálmahttin diehtojuohkinjođus mohtorfievrruid birra mat leat dáhkiduvvon ja mat eai leat dáhkiduvvon. Dáhkádusfitnodagaid oktasaš vuogádat “TFFAuto” šaddá váldogáldun mohtorfievrru dáhkádusstáhtusii Norggas, ja dát boahtá ollu álkidahttit Stáhta geaidnodoaimmahaga, dáhkádusfitnodagaid ja mohtorfievroeaiggádiid bargodábiid.

Gulaskuddanáigemearri lea njukčamánu 3.b.2017.

Loga gulaskuddama dáppe