Feargalonuhanortnet addá eanet šalde- ja tuneallaprošeavttaid

Fylkkageaidnofearggaid ođđa feargalonuhanortnet dahká vejolažžan čađahit eanet šalde- ja tuneallaprošeavttaid. Dál leat njuolggadusat dán ortnegii válbmasat.

Fylkkageaidnofearggaid feargalonuhanortnet ásahuvvui 2016.  Feargalonuhanortnet addá fylkkagielddaide vejolašvuođa geavahit feargajođihanruđaid hukset šaddiid ja čázevuole tuneallaid ovdal go feargagaskaoktavuođaid. Gielda- ja ođasmahttindepartemeanta ja Johtalusdepartemeanta leat dál ráhkadan njuolggadusaid mat áiddostahttet ortnega eavttuid ja čilgejit ohcanproseassa.

-Ortnet dahká vejolažžan čađahit eanet šalde- ja tuneallaprošeavttaid, vai gielddat ja regiovnnat buorebut čadnojuvvojit oktii. Mii doaivut ahte dat váikkuhivčče riddogielddaid ovdáneapmái ja árvoráhkadeapmái , cealká gielda- ja ođasmahttinministtar Jan Tore Sanner. 

Fylkkagielddat mat huksejit šaldi dahje tunealla ovdalgo feargagaskaoktavuođaid, besset doalahit ruđaid maid leat tinen feargajohtalusas 40 jagi maŋŋil go feargagaskaoktavuohta lea heaittihuvvon. Ruđaid maid sii ovdal leat geavahan feargajohtalussii sáhttá geavahit ruhtadit šaldi dahje tunealla. Njuolggadusat sihkkarastet diehttevašvuođa, ja addá fylkkagielddaide rávvagiid movt ohcat feargalonuhanruđaid.  

-Dat lea jierpmálaš dahku hukset šalddiid ovdal go máksit stuora buhtadusruđaid agibeaivvi feargajohtalussii. Lean ilus go mii dál sáhttit fylkkagielddaide ásahit seamma ortnega go riikkageainnuin. Mátkkálaččaide šaddá buoret árgabeaivi ja stáhtabušeahtta seastá ruđaid, dadjá johtalusministtar Ketil Solvik-Olsen. 

Njuolggadusat čilgejit ahte feargalonuhanruđat meroštallojuvvojit tienasvuogádaga vuođul mii gusto go ohcan meannuduvvo. Njuolggadusat maid čilgejit ahte ortnet gusto fylkkagielddaid feargagaskaoktavuođaide mat ledje dábálaš doaimmas ođđajagimánu 1.b. 2016. Dat mearkkaša ahte máŋga geaidnoprošeavtta iešguđet plánadásis gullet dán ortnega vuollái.

Johtalusdepartemeanta árvvoštallá makkár prošeavttat ožžot doarjaga dán ruhtadanortnega bokte.

Njuolggadusaid gávnnat Johtalusdepartemeantta ja Gielda- ja ođasmahttindepartemeantta neahttasiidduin.