Finánsadepartemeanta nammada ođđa riikaviidosaš vearrováiddalávdegotti

Finánsadepartemeanta lea odne namahan miellahtuid ođđa riikaviidosaš vearrováiddalávdegoddái. Advokáhtta Gudrun Bugge Andvord ja professor Benn Folkvord leaba jo ovdalis namahuvvon Vearrováiddalávdegotti jođiheaddjin ja nubbinjođiheaddjin. Dál lea departemeanta namahan eará miellahtuid.

2015’ stáhtabušeahtas evttohii Ráđđehus nannet váiddameannudeami vearrosuorggis ođđa riikaviidosaš vearrováiddalávdegotti ásahemiin. Vearrováiddalávdegoddi ásahuvvo suoidnemánu 1.b. 2016, ja galgá buhttet dálá vihtta regionála vearrováiddalávdegotti, Olgoriikaáššiid váiddalávdegotti, Stuorrafitnodagaid váiddalávdegotti ja Lassiárvodivada váiddalávdegotti.

Ráđđehus dáhttu nannet vearromáksiid riektesihkkarvuođa. – Ođđa Vearrováiddalávdegoddi galgá nannet vearromáksiid riektesihkkarvuođa ja sihkkarastit váiddaáššiid beaktilis meannudeami. Lea dehálaš ahte váiddameannudeapmi ii ádján, ja ahte gelbbolaš lávdegoddi meannuda váidaga, dadjá finánsaministtar Siv Jensen.

Sierra čállingoddi mii galgá ráhkkanahttit áššiid lávdegoddái, ásahuvvo dál Stavangeris. Čállingoddi gullá hálddahuslaččat Vearrodirektoráhta vuollái, muhto vai galgá sihkkarastit lávdegotti duohta sorjjasmeahttunvuođa, de lea lága bokte nannejuvvon ahte čállingotti ii sáhte bagadit fágalaš gažaldagain. Sierra čállingoddi galgá maiddái sihkkarastit ahte váiddaáššiid árvvoštallet ođđa áššemeannudeaddjit geain lea gaska ovddeš mearrádusaide.

Lávdegottis leat jođiheaddji, nubbinjođiheaddji ja 51 dábálaš miellahtu, ja sii barget dábálaččat golmmaolbmoossodagain. Váiddaáššit sáhttet muhtun dilálašvuođain mannat viidáseappot ođđa meannudeapmái viiddiduvvon ossodagas mas leat vihtta olbmo oktan lávdegotti jođiheddjiin dahje nubbinjođiheddjiin.

Lávdegotti čoahkkádussii lea Finánsadepartemeanta ohcan olbmuid geain leat buorit vearro- ja divatfágalaš gelbbolašvuođat ja hárjáneamit.

Bajilgovva lávdegotti miellahtuin ja várreáirasiin