Eanebut válljejit bohccobierggu ođđajagiruohta málisin
Historjjálaš arkiiva
Almmustahttináigodat Solberga ráđđehus
Almmustahtti: Eanandoallo- ja biebmodepartemeanta
Ođas | Almmustahtton: 10.01.2015
Dušše gálkon ja sávzzagoasteerttet leat bivnnuhabbot, go bohccobiergu lea guovddážis jagi maŋimuš beaivve málisin. Dan čájeha varas iskkadeapmi bohccobierggu birra, maid YouGov lea dahkan MatPrat ovddas. 23 proseantta vástidit iskkadeames, ahte sii válljejit bohccobierggu ođđajageruohta ávvomállásiidda. Iskkadeapmi čájeha maid ahte olbmuid mielas lea bohccobierggus eanemus máistu.
- Oaččuimet seammá vástádusa, go iskkadeimmet oaiviliid 2012, muitala MatPrata biebmorávvejeaddji Ragnhild Kolvereid. – Lea ereliiggán suohtas go aiddo nuorat borret eanemusat bohccobierggu.
Norgalaččat geahččaladdet eanet ja eanet ođđa biepmuid ja borramušávdnasiid, mat bohtet máilmmi sierra osiin. Dakkár borramušaid ja borramušvásáhusaid girjáivuođas lea bohccobierggus lunddolaš sadji, eanandoallo- ja biebmoministtar Sylvi Listhaug dadjala. – Bohccobierggu máistu buktá millii duoddariid; luođus guohttu elliid, mat čuvvot jahkodagaid ja duovdagiid. Bohccobiergu lea dearvvasleamos biergu, maid sáhttit borrat. Sámi kultuvra lea ealli kultuvra, ja addá borramušvásáhussii lassi dimenšuvnna, danin go sápmelaččat čuvvot ealuideaset 8 jahkodaga, gáibideaddji dálveguohtumiin, giđđajohtimis ja guottehis, šattolaš geasseguohtumiin, čakčat, ragatáigge ja njuovvanáigge, Listhaug čilgesta.
Iskkadeapmi čájeha, ahte bohccobierggu geavaheapmi lassána. Erenoamážit illudan, go nuorat borret eanet bohccobierggu. Dat čájeha, ahte lea ávki ovddidit ođđa buktagiid márkana várás ja ovddidit málestanrávvagiid ođđa geavaheaddjijoavkkuide, Listhaug dadjala, ja deattasta ahte dál lea mávssolaš geavahit liibba dasa, ahte boazodoalloealáhus beassá geavahit vejolašvuođaidis. – Dat sihke sihkkarastá ahte boazodoalloealáhus birge boahtteáiggisge ja addá geavaheddjiide vejolašvuođa máistit kvaliteahttabuktagiid, mat bohtet Norgga duoddariin, eanandoallo- ja biebmoministtar Sylvi Listhaug nanne
Bohccobiergu sihke árbevirolaš ja ođđa borramušain
- Mii jurddašeimmet nuoramus geavaheddjiid, go ovddideimmet jagi juovlakollekšuvnna neahttasiidui matprat.no, muitala Kolvereid. – Njálgga, liegga dálvebiđusruittuid ja árbevirolaš čoarbbeliid lassin mii oaidnit, ahte nuorabut jearahit maid geahppasut borramušaid, mat sáhttet gullat tapas-beavdái, go ustibaččat deaivvadit luomus oktavuođain, dahje njálgga álgobiebmun. Bohccobiergu heive álggahussan go váldobiebmun lea juovladorski, ođđajagigálkon, fuođđomális ja eará maid. Juovlamánu ovdal mii leatge ovddidan ođđa borramušrávvagiid, ovdamearkka dihte ovdal giksadeami marinerejuvvon bohccobierggu ásialaš máisttuiguin, bohccobiergo-tataki luomesevssain ja uhca burgeraččaid goikebiergguin.
Bohccobiergu lea norgalaš borramušávnnas, mas lea nana kvaliteahtta, ja maid galgá meannudit gudnejahttimiin, muhto galgá leat lohpi ovttastahttit dan njálgga máisttuiguin, mat bohtet riikkarájáid rastá, sihkkarastá Kolvereid.
MatPrat gulahallanolbmot:
Biebmoráđđeaddi Ragnhild Kolvereid, mobiila: 41 80 53 00
Preassagulahalli Trude E. Henrichsen, mobiila: 930 94 595