Gáibideaddji Norgga gielddaide

Informasjon om koronasituasjonen endrer seg raskt og kan derfor være utdatert. 

Sjekk temasiden Koronasituasjonen for siste nytt fra regjeringen, eller Helsenorge.no for oversikt over råd og regler om koronaviruset på samisk.

-Koronavirusa leavvama geažil lassánit golut ollu gielddain. Danne evttoha ráđđehus dán jahkái juolludit 250 miljovnna ruvnnu lassidoarjaga gielddaide, dadjá gielda- ja ođasmahttinministtar Nikolai Astrup.

Gielda- ja ođasmahttindepartemeantta ovddasvástádus lea oktiiheivehit stáhta politihka gielddain, ja fuolahit ahte gielddat sáhttet doaibmat vai nagodit čoavdit doaimmaideaset. Gielda- ja ođasmahttinministtar čuovvu dili Norgga gielddain hui dárkilit.

-Mii árvvoštallat ahte gielddaid golut bohtet lassánit dán áigodagas. Dál lea erenoamáš stuora dárbu fálaldagaide maid buohcceviesut ja ruovttubálvalus fállet, ja buhtisteapmi lea dál erenoamáš dehálaš eastadit koronavirusa leavvama.  Seammás njiedjá lohku gielddabargiin geat čađahit dákkár dehálaš doaimmaid. Veahkehan dihte gielddaid dákkár váttis dilis, de lasihat doarjaga gielddaide 250 miljovnna ruvnnuin, dadjá Nikolai Astrup (O). 

Ruhtadoarjja galgá gokčat lassigoluid mat čuvvot njoammudávdda mielde. Fylkkamánni juogada ruđaid gielddaide maŋŋil go fylkkaidgaskasaš juogadeapmi lea válmmaš.

Golut lassánit muhtun áigái

Dál lea vuos váttis diehtit sihkkarit movt koronavirus boahtá váikkuhit gielddaid ekonomiijai. Uhcán dienas dieđusge addá uhcit vearrosisaboađuid, ja easkka muhtun áiggi geažes beassat oaidnit mo dilli váikkuha gielddaid bušeahtaide.  Gielddat galget čuovvut jagi 2020 vearromeroštallama.

Ollu fitnodagat masset dál sisaboađuid. Dat mielddisbuktá ekonomalaš roasu ja bargguhisvuođa. Gielddat fertejit danne ráhkkanit dasa ahte dárbu sosiálaveahkkái lassána, ja dál lea vuos váttis oaidnit movt dat váikkuha bušeahtaide. 

-Gielddain lea leamaš buorre ekonomalaš dilli máŋga jagi, ja uhcán gielddat leat nu gohčoduvvon Robek-listtus. Jos vel dilli lea gáibideaddji ja hástaleaddji, de nagodit Norgga gielddat bures hálddašit ja dustet dan dili mii mis dál lea, dadjá Astrup. 

Buoret vejolašvuohta čađahit telefovdnačoahkkimiid

Dearvvašvuođaeiseválddit ávžžuhit garvit stuorra olmmošjoavkkuid. Seammás lea mearrideaddji dehálaš ahte gielddastivrrat ja fylkkadikkit sáhttet dahkat johtilis mearrádusaid dan dilis mas mii leat.

Gielddastivračoahkkimin ja eará álbmotválljejuvvon orgánaid čoahkkimiin lea stuorit njoammunvárra, ja danne leat mii odne mearridan gaskaboddosaš láhkaásahusa mii  álkidahttá telefovdna- ja videočoahkkimiid čađaheami gielddain ja fylkkagielddain.  Láhkaásahus gusto borgemánu 1.beaivái 2020.  

 

Gielddalága vuođul galget áirasat ja álbmotválljen áirasat fysalaččat oassálastit álbmotválljejuvvon orgánaid ja eará gielddalaš orgánaid čoahkkimiin. Ássit galget maid beassat čuovvut čoahkkimiid.  

Láhka sisttisdoallá maid njuolggadusaid gáiddusčoahkkimiid birra. Ođđa láhkaásahus láhčá gáiddusčoahkkimiidda buoret čađahanvejolašvuođaid.

Ođđa láhkaásahus rahpá maid gielddaide vejolašvuođa čađahit čoahkkimiid telefovnna dahje video bokte. Dan lassin ii leat dárbu čuovvut gáibádusa ahte ássit galget beassat čuovvut gáiddusčoahkkimiid, jos dat ii leat vejolaš teknihkalaččat. 

Gielda- ja ođasmahttindepartemeantta preassatelefovdna: 22 24 25 00