Garraseabbo iskkusgáibádusat

Rievdadusat čađahuvvojit Dearvvašvuođadirektoráhta ja Álbmotdearvvašvuođainstituhta neavvagiid vuođul.

-Norga geavaha eanemus gáibideaddji ja garraseamos vuogádagaid Eurohpás amas dávda ii leava olgoriikkas Norgii. Dál mearridat vel garraseabbo iskkusnjuolggadusaid. Dan dahkat eastadit ođđa ja váraleabbo koronavirusiid leavvamis,  dadjá dearvvašvuođa- ja fuolahusministtar Bent Høie.     

Buohkat, geat maŋimuš 10 beaivvi leat leamaš dakkár guovlluin mat mielddisbuktet errengeatnegasvuođa galget válddihit iskosa Norgga rájáin. Iskkus galgá leat antigen- jođánisiskkus. Gáibiduvvo maid dál ahte, jos jođánisiskkus lea positiiva ja jos mátkkošteaddji boahtá eará riikkas go EEO- ja Schengenguovllus, de galgá vel dan lassin PCR-iskkus válddihuvvot riikkarájá alde. Ovdal sáhtii válddihit PCR-iskosa 24 diimmu siste riikii boahtima maŋŋá. Dearvvašvuođadirektoráhta ja Álbmotdearvvašvuođainstituhtta árvvoštallama mielde lea dákkár doaibmabijuide dárbu goazahan dihte njoammuma leavvamis Norgii ja eastadit ođđa virusiid.

Dál gáibiduvvo ahte buohkat geat leat mátkkoštanerremis ja geat eai leat errenhoteallas galget váldit iskosa čihččet beaivvi. Njuolggadusat rievdaduvvojit nu ahte dat gustojit maid olbmuide geat leat errenhoteallas. Gielddaid ovddasvástádussii gullá fállát diekkár iskosiid.   

Rievdadusat bohtet fápmui duorastaga cuoŋománu 29.beaivvi gaskaija rájes.

Dál gáibiduvvo maid ahte buohkat geat bohtet riikkain nu go Bangladesh, India, Irak, Nepal dahje Pakistan, galget leat errenhoteallas, soames smávva spiehkastagaiguin. Dat mearkkaša ahte maiddái mátkkošteaddjit geat leat leamaš dárbbašlaš mátkkiin namuhuvvon riikkain fertejit leat errenhoteallas. Čavgejuvvon mátkkoštanráddjehusat maid mátkkošteaddjit ovdalis namuhuvvon riikkain fertejit čuovvut gustogohtet gaskavahkku, cuoŋománu 28.b. dii. 12.00. Buohkat, geat bohtet Norgii ja leat leamaš ovdalis namuhuvvon riikkain maŋimuš 10 beaivvi fertejit leat errenhoteallas.

Loga eanet gustovaš errenhoteallaortnega birra dáppe.