Historjjálaš arkiiva

Reviderejuvvon nationálabušeahtta

Gaskaáigásaš lassiárvodivatgeahpedeapmi joatkašuvvá

Historjjálaš arkiiva

Almmustahttináigodat Solberga ráđđehus

Almmustahtti: Ruhtadandepartemeanta

Ráđđehus evttoha čakčamánu 30.beaivvi 2021 rádjai joatkit lassiárvodivatdási mii lea geahpeduvvon 12 proseanttas 6 prosentii.

– Ollu mátkeealáhussii ja olmmošfievrrideapmái guoskevaš fitnodagat leat garrasit gillán koronapandemiija geažil. Daid fitnodagaide lea hirbmat buorre ahte geahpeduvvon lassiárvodivatdássi joatkašuvvá dál go servodat dađis fas doaibmagoahtá, ja ahte dat ii  rievdaduvvo alimus ja deháleamos bargoáigodagas, dadjá ruhtadanministtar Jan Tore Sanner (O).

Lassiárvodivada máksomearri lea gaskaáigásaččat geahpeduvvon 12 proseanttas 6 prosentii cuoŋománu 1.b.2020 rájes gitta geassemánu 30.b.2021 rádjai. Geahpedeapmi guoská olmmošfievrrideapmái, idjadanbáikkiide, álbmotsáddehahkii, kinoi, museaide, suohtastallanpárkkaide ja stuorit valáštallandoaluide.

Geahpeduvvon divatdássi loktejuvvo fas 12 prosentii golggotmánu 1.b.2021. Ekonomalaš doaibmabijut galget maid heivehuvvot ođđa dillái dađis go njoammuneastadandoaimmat loahpahuvvojit. Dat dieđusge mielddisbuktá ahte gaskaáigásaš divatgeahpedeapmi maid loahpahuvvo.