Boahkuid juohkin rievdaduvvo geográfalaččat: 45 proseantta eanet dosa 24 suohkanii

Informasjon om koronasituasjonen endrer seg raskt og kan derfor være utdatert. 

Sjekk temasiden Koronasituasjonen for siste nytt fra regjeringen, eller Helsenorge.no for oversikt over råd og regler om koronaviruset på samisk.

FHI ođđa rehkenastimat čájehit ahte go boahkkodosaid juohkin rievdaduvvo 60 proseantan, de dat mielddisbuktá ahte suohkanat main lea unnán njoammun fertejit addit mealgat eanet go dušše 35 proseanta iežaset boahkuin. Eastadan dihte ahte suohkanat šaddet addit eanet go plánejuvvon, de leat rievdadan juohkima nu ahte suohkanat mat galget oažžut lassi dosaid, ožžot dušše 45 proseantta eanet.

Ráđđehus mearridii mannan vahkku juohkit boahkkodosaid eanet ulbmillaččat suohkaniidda main lea leamašan olu njoammun ja čavges doaibmabijut guhkit áiggi. 24 suohkana galge oažžut 60 proseanta eanet boahkkodosaid.

Seammás lei, ja lea ain, ráđđehussii dehálaš sihkkarastit ahte suohkanat sáhttet birget váikkuhusaiguin. Suohkanat dieđihedje ahte boahtá šaddat váttis, muhto eanas suohkanat vástidedje ahte sii birgejit.

– Ráđđehus lea loahpas árvvoštallan ahte ii oktage suohkan galgga addit eanet go sullii 35 proseantta sin boahkkodosain. Dat mielddisbuktá ahte geográfalaš juohkin rievda­duvvo 45 proseantan.

FHI duođašta ahte rievdadeamis boahtá ain leat buorre ávki, ja ahte boahkuhan­áige­plána dán geasi ii rievdda namuhanveara, dadjá dearvvašvuođa- ja fuolahusministtar Bent Høie. Ođđa loguid duogáš lea earret eará ahte dál leat eanet suohkanat main eai galgga unniduvvot dosat. Dasa lassin lea FHI geahččan geavatlaš oktavuođaid boah­kuid juohkimis. Dat eai lean mielde daid ovddit meroštallamiin.

– Go rádji bisuhuvvo 35 proseanttas, de unnu riska maŋŋonemiide suohkaniin. Norgii galget boahttevaš vahkkut boahtit olu boahkkodosat. Suohkaniin ii bisán boahku­heapmi vaikko juohkin rievdaduvvo ge, muhto dat 24 suohkana mat ožžot lassi dosaid besset boahkuhit jođáneappot, deattuha Høie.

Jus boahkkobuvttadeapmi čuovvu plána, de ožžot buohkat geat leat badjel 18-jagi dan 24 suohkanis, fállojuvvot boahku gaskkamutto suoidnemánu. Nu čájehit FHI rehkenastimat.

– Ođasmahttojuvvon dieđut čájehit ahte vahkkus 23 buvttaduvvojit sullii 300 000 boahkkodosa, eai ge 340 000 nu movt álggos navdojuvvui. Mii sávvat ahte dosat jovdet deike jođánit vai mii nagodit čuovvut boahkuhanáigeplána, loahpaha Høie.