Buorit ođđasat boazodoalus

Eanadoallodirektoráhta almmuhii ikte Finnmárkku boazologu ja dat čájeha ahte eanaš boazoeaiggádat leat geahpedan boazologuset geahpedanmearrádusaid mielde. Nuorta- ja Oarje-Finnmárkku boazolohku lea oktiibuot 148 800 bohcco. – Mun háliidan rámidit daid boazoeaiggádiid geat leat čađahan bargguset, cealká eanadoallo- ja biebmoministtar Sylvi Listhaug.

Cuoŋománu 1.b.2012 ledje Finnmárkkus sullii 42 000 bohcco eanet go dan maid eatnamat girdet, ja Boazodoallostivra gohččui buot orohagaid gos boazolohku leai menddo allat geahpedit mearriduvvon lohkui. Geahpedanáigodat molsašuvai jagis golmma jahkái sorjavaš orohagaid geahpedanlogus. Boazolohku cuoŋománu 1.b.2015 čájeha ahte eanaš siiddaoasit leat čuvvon geahpedangáibádusaid. Dat mearkkaša ahte Finnmárkku boazolohku oppalohkái lea vuolábealde meari mii lea biddjon.

– Boazodoalu boahtteáigái lea mearrideaddjin ahte mii dál leat lihkostuvvan boazologu geahpedemiin. Dat lea buorre elliidčálgui ja addá ealáhussii buoret ekonomiija, mii lea ávkkálaš olles boazodoaluealáhussii, dadjá eanadoallo- ja biebmoministtar Sylvi Listhaug. 

Jos vel eanaš boazoeaiggádat leat geahpedan boazologu mearrádusaid vuođul, de leat vel 15 siidaoasit geat eai leat olahan mearriduvvon boazologu. Boazodoallostivra galgá čuovvolit dan ášši. 12 siiddaoassái lea juo sáddejuvvon ovddalgihtii dieđiheapmi ahte sii sáhttet sáhkohallat jos sii mearriduvvon oanehis áiggis eai geahpet boazologu mearriduvvon dássái. 

– Mun oaivvildan ahte lea áibbas dárbbašlaš ahte eiseválddit  ráŋggáštit boazoeaiggádiid geat eai daga dan maid galget. Sii eai galgga beassat billistit sin ovddas geat boazologu leat geahpedan ja oskkáldasat čuvvon mearrádusaid, dadjá eanadoallo- ja biebmoministtar.   

Boazodoalloeiseválddit áigot dárkilit čuovvut boazologu ovdáneami. Boazolohkamat galget dán čavčča čađahuvvot nu go ovddit jagiid ge, sihkkarastin dihte ahte almmuhuvvon logut leat riekta. Muđui leat šiehtadallanbealit soahpan ahte jos siidaoasit lasihit boazologu, de eai galgga oažžut doarjagiid. Siidaoasit geat baicce doalahit dássedis boazologu ja doalahit boazologu vuolábealde meari mii lea biddjon, galget oažžut doarjagiid. 

Boazodoalus lea dál erenoamáš vejolašvuohta buoridit buvttadeami ja nu lasihit tietnasa go márkandilli lea buorre. Boazoeaiggádat fertejit ain vuovdit njuovvanbohccuid njuovahagaide doalahan dihte bierggu jearu.    

– Mus lea jáhku ahte boazodoallu oaidná daid vejolašvuođaid mat dál leat rahpasan ja váldá ovddasvástádusa ovddasguvlui, loahpaha eanadoallo- ja biebmoministtar Sylvi Listhaug. 

Hálddahuslaš direktora Jørn Rolfsen, Eanandoallodirektoráhta ja eanandoallo- ja biebmoministtar Sylvi Listhaug
Hálddahuslaš direktora Jørn Rolfsen, Eanandoallodirektoráhta ja eanandoallo- ja biebmoministtar Sylvi Listhaug. Govva: Eanandoallodirektoráhta