Háliidat šaddat čeahpibun eastadit radikaliserema

Justiisa- ja gearggusvuođaministtar Anders Anundsen rahpá Radikaliserenkonfereanssa 2013.

Justiisa- ja gearggusvuođaministtar Anders Anundsen.

Justiisa- ja gearggusvuođaministtar Anders Anundsen rahpá Radikaliserenkonfereanssa 2013.

-Mis leat vejolašvuohta buoridit eastadandoaimmaid, celkkii justiisa- ja gearggusvuođaministtar Anders Anundsen rabadettiin Radikaliserenkonfereanssa 2013.

-Norggas leat mii čeahpit divodit. Mun balan ahte jos dušše vuoruhat divodemiid, de billistat eastadandoaimmaid – ja sivvan dasa soaitá ahte divodemiid lea álkit mihtidit go eastademiid. Eastadandoaimmain leat stuora ovdánanvejolašvuođat, dajai justiisa- ja gearggusvuođaministtar.

-Midjiide šaddá hástalussan go oaidnit mediain ahte dábálaš nuorat geat leat šaddan bajás dábálaš birrasiin, ja geain eai leat erenoamáš láhttenváttut, oanehis áiggis rievdadit láhttenvuogi ja radikaliserejuvvojit. Ja muhtumat sis fárrejit olgoriikii – ovdamearkka dihte Syriai, dajai justiisa- ja gearggusvuođaministtar.

Háliida árvalusaid

2014 áigu ráđđehus ovddidit ođđa doaibmaplána movt vuosttaldit radikaliserema ja veahkaválddálaš ekstremismma. Dat galgá bargoneavvun sidjiide geat njuolgut barget dákkár hástalusaiguin.

Justiisa- ja gearggusvuođaministtar bovde buohkaid buktit oaiviliid doaibmaplánii. Árvalusat sáhttet ovdamearkka dihtii leat konkrehta doaibmabijut, hástalusat maid berre guorahallat lagabui dahje rávvagat bargovugiide.