Luovosárbi galgá juogaduvvot mánáid ja nuoraid astoáiggefálaldagaide
Historjjálaš arkiiva
Almmustahttináigodat Solberga ráđđehus
Almmustahtti: Kulturdepartemeanta
Preassadieđáhus | Nr: 128/16 | Almmustahtton: 16.12.2016 | Maŋimuš ođasmahttojuvvon: 02.01.2017
Láhkaásahus luovosárbbi birra dohkkehuvvui odne stáhtaráđis. Ođđa láhkaásahus cealká ahte jos olbmos gii jápmá eai leat fuolkkit, náittosguoibmi dahje ovttasássi geat árbejit, ja ii ge testameanta árbbi juohkima birra, de galgá nettoopmodat juogaduvvot eaktodáhtolaš doaimmaide. Doaimmat mat gusket mánáide ja nuoraide geain leat hedjonan doaibmanávccat galget vuoruhuvvot.
Luovosárbi váikkuha dasa ahte eaktodáhtolaš organisašuvnnat sáhttet fállat eanet doaimmaid mánáide ja nuoraide, cealká kulturministtar Linda Hofstad Helleland.
-Mánát ja nuorat geain leat hedjonan doaibmanávccat eai searvva nu dávjá organiserejuvvon astoáigge- ja valáštallandoaimmaide go eará mánát. Eaktodáhtolaš organisašuvnnat mat ovddidit buriid astoáiggefálaldagaid ja deaivvadanbáikkiid leat hirbmat dehálaččat mánáide ja nuoraide geain leat hedjonan doaibmanávccat, dadjá kulturministtar Helleland.
Luovosárbbi ruhtasupmi lea leamaš jahkásaččat gaskal 3 ja 20 miljovnna kruvnnu daid maŋimuš jagiid, gaskamearálaččat sullii 10 miljovnna kruvnnu.
Ruđat galget juogaduvvot Norgga mánáid- ja nuoraidorganisašuvnna Riikkaráđi (LNU) bokte, njuolggadusaid mielde maid LNU lea mearridan ja maid Kulturdepartemeanta lea dohkkehan.