Aktiver Javascript i din nettleser for en bedre opplevelse på regjeringen.no

Gulaskuddan almmolaš suorggi bargiid ođđa penšuvdnačovdosa birra

Bargo- ja sosiáladepartemeanta sádde gulaskuddamii ođđa penšuvdnaortnetevttohusa almmolaš suorggi bargiide. Láhkaevttohus sisttisdoallá maid sirdásannjuolggadusaid otná penšuvdnaortnegis ođđa ortnegii.

Gulaskuddan lea šiehtadusa čuovvoleapmi maid Bargo- ja sosiáladepartemeanta, LO, Unio, Akademikerne, KS ja Spekter sohpe njukčamánu 3.b. 2018 ođđa bálvaluspenšuvnna birra almmolaš suorggi bargiide. 

– Dat viiddis guorraseapmi maid penšuvdnašiehtadus lea ožžon almmolaš suorggi bargiin čájeha ahte penšuvdnačoavddus mii dál sáddejuvvo gulaskuddamii lea juoga maid sihke almmolaš suorggi bargit ja sin organisašuvnnat leat háliidan, dadjá bargo- ja sosiálaministtar Anniken Hauglie.

Ođđa penšuvdnačoavddus dahká vejolažžan buhttet eallinagimuddema váikkuhusaid go sáhttet leat bargodilis guhkit. Almmolaš suorggi bargit ožžot buori penšuvdnadási boahttevaš áiggis go eallinahki goargŋu. Šaddá maid álkit lonuhit barggu gaskal almmolaš ja priváhta suorggi massikeahttá penšuvnna. 

Buohkat geat leat riegádan jagis 1963 dahje maŋŋil sáhttet váldit ođđa ahkepenšuvnna máškidit dan rájes go devdet 62 jagi ja friddja ovttastahttit bargguin.

Gulaskuddanáigemearri lea ođđajagimánu 9.b. 2019.

 

Bajás