Tine Sundtoft ođđa dálkkádat- ja birasgáhttenministtar

Tine Sundtoft (46) lea stáhtaráđis gaskavahko nammaduvvon dálkkádat- ja birasgáhttenministtarin. Sundtoft lea ovdal leamaš Vest-Agder fylkkaráđđeolmmái.

Tine Sundtoft lea eret Lillesand gávpogis Aust-Agderis ja lea čađahan siviilaekonoma oahpu BI Gávpeallaskuvllas. Son lea leamaš NHO regiovdnadirektevra Agderis jagi 1995 rájes jagi 2005 rádjái, ja fylkkaráđđeolmmái Vest-Agder fylkkagielddas 2005 čavčča rájes.

-Dálkkádatrievdamat leat okta olmmošsoga stuorimus hástalus. Daid ferte vuosttaldit nationála ja riikkaidgaskasaš árjjaiguin ja mun illudan sakka bargagoahtit dáid áššiiguin. Ovdal jagi 2050 galgat mii šaddat dakkár servodahkan mii uhcán nuoskkida ja dat ii leat álkis bargu, cealká Sundtoft.

Ráđđehus áigu suodjalit biologalaš eatnatgeardáivuođa buoremussan boahtteáiggi buolvvaide, ja oaivvilda ahte dat dahkko buoremusat guoddinana geavahusain ja gáhttemiin.  Ođđa dálkkádat- ja birasgáhttenministtar áigu ulbmillaččat suodjalit luonddu máŋggabeallásašvuođa min riikkas.   

-Mis galgá leat buolvvaidperspektiiva dan politihkas maid fievrridat. Eananspábba maid mii guođđit mánáidasamet galgá leat unnimusat seammá dásis go dat leai go min váhnemat dan adde midjiide. Mii leat lihkolaččat go mis Norggas lea nu buhtis ja máŋggalágan luondu. Mu mihttomearri lea ahte buohkat Norggas galget oažžut buriid luondduvásáhusaid, dadjá Sundtoft.

Geahča govaid čoavddakoartta geigema dilálašvuođas Flickr-siidduin

 

Tine Sundtoft ođđa dálkkádat- ja birasgáhttenministtar. (Foto: Anne Elisabeth Scheen, Birasgáhttendepartemeanta.)