Kulturdepartemeanta juolluda 100 000 ođđa eksportabálkkašupmái norgga musihka várás

Kulturdepartemeanta ruhtada stipeandda norgga musihka aiddo ásahuvvon Eksportabálkkašumis. Bálkkašumi leat Music Norway ja Spellemann vuolggahan, ja dat galgá gudnejahttit musihkkáriid geat ovddidit norgga musihkkaeksportta.

- Norgga musihkka ii leat goassige leamaš ná beakkán go dál, ja beakkán olbmot leat riikkaidgaskasaš lávddiin, muhto maiddái kulissain. Dáinna stipeanddain mii háliidat leat mielde dagaheamen norgga musihka nana eksportagálvun maiddái boahtte buolvvas, lohká kulturministtar Linda Hofstad Helleland.

Stipeandda namma lea "Dás dat álggii" (Det var her det begynte) ja geigejuvvo kandidáhttii guhte jagi 2015 áigge lea leamaš mielde čalmmustahttimin norgga musihka riikkaidgaskasaččat. Jurdda lea ahte bálkkašumi vuoiti galgá addit ruđa viidáseappot dehálaš gáldui dahje birrasii mii lea váikkuhan dasa ahte bálkkašumi vuoiti álggii musihkain ja movttiidahtii su musihkalaš ovdáneapmái.

Bálkkašupmái gullá spellemannbáccáš, virggálaš diploma ja 100 000 kruvdnosaš stipeanda man Kulturdepartemeanta addá.

Jury, mas leat vihtta fágaolbmo, galget válljet bálkkašumi vuoiti eavttuid vuođul mat ovddidit norggaprofilerema, buori ealáhushutkama, máhttojuohkima ja gealbosirdima. Jury maiddái geahčada relevánta vuovdinloguid (fysalaš skearrovuovdin, streamen, vieččahahtti bálvalusat, rádiočuojaheamit jna.). Bálkkašumi vuoiti almmuhuvvo miessemánus, ja bálkkašupmi geigejuvvo geassemánu álggus Music Norwaya jahkásaš geassefeasttas.