Stáhtabušeahtta 2018

Kulturministtar evttoha 3 milliuvnna ruvnna ásahit Našunálagirjerádjosii historjjálaš kárttaid guovddáža

Seastinbáŋku-vuođđudus DNB lea oastán čohkkejeaddji William Ginsberga earenoamáš historjjálaš kártačoakkáldaga Norgga ja davviguovlluid eatnamiin, ja luoikán dan Našunálagirjerádjosii. Ráđđehus evttoha lasihit doarjagiid Našunálagirjerádjosii 3 milliuvnna ruvnnain vai besset váldit vára kárttain ja gaskkustit daid.

– Čohkkejeaddji William Ginsberg logenar jagiid áŋgiruššama bokte, Seastinbáŋku-vuođđudusa rivkkasvuođa geažil ja Našunálagirjerádjosa bargguid bokte sáhttet dál hálddašit ja vurkkodit dan stuorámus ja buoremus historjjálaš kártačoakkáldaga mii lea Norgga ja davviguovlluid eatnamiin Našunálagirjerádjosis ja nu gaskkustit dan dutkamii ja álbmogii, lohká kulturministtar Linda Hofstad Helleland.

– Dát čájeha maid lea vejolaš olahit buori almmolaš-priváhta ovttasbarggu bokte. Dan háliidit mii ráđđehusa bealis movttiidahttit ain. Danne lean ilus go sáhttit doarjut dán ovttasbarggu, dadjá kulturministtar.

Dat 3 milliuvnna ruvnna maid ráđđehus juolluda dása galget adnojuvvot ásahit ođđa kártaguovddáža Ginzberg-čoakkáldahkii Našunálagirjerádjosii. Doppe almmuhuvvo čoakkáldat Norgga ja eará riikkaid dutkiide. Dohko ásahuvvojit dutkansajit ja dutkangirjerádjosat maid sis- ja olgoriika dutkat sáhttet atnit.

William Ginsberg lea 1983 rájes systemáhtalaččat čohkken kárttaid Norgga badjel. Ginsberg lea Amerihká stáhtaboargár, muhto lea iežas norgga eamida bokte nanu čanastagat Norgii. Son lea badjel golbmalot jagi beroštan ja sus leamašan ruhta čohkket kárttaid, atlasiid ja mearrakárttaid main fokus leamašan Norga ja davviguovllut. Čoakkáldagas leat badjel 1000 oasi, ja árvu dain lea sullii 60 milliuvnna ruvnna. Kárttaid gaskkas gávdnat maid dan vuosttaš deaddiluvvon kártta Davviguovllus mii lea jagi 1482:s ja vuosttaš deaddiluvvon máilmmikártta masa maid Norga lea tevdnejuvvon, maid seamma jahkelogus. Ginsberg lea háhkan kárttaid miehtá máilmmis, ja lea vurkkodan čoakkáldaga eanas áiggi Amerihkás.  

Dat vuosttaš kárttat leat juo ollen Našunálagirjerádjosii. Reasta čoakkáldagas vižžojuvvo Amerihkás dán jagi mielde.