Kulturráđi museafágalaš doaimmat sirdojuvvojit Bådåddjui
Historjjálaš arkiiva
Almmustahttináigodat Solberga ráđđehus
Almmustahtti: Kulturdepartemeanta
Preassadieđáhus | Nr: 8/17 | Almmustahtton: 15.02.2017 | Maŋimuš ođasmahttojuvvon: 20.02.2017
Kulturdepartemeanta lea mearridan sirdit Kulturráđđái gullevaš nationála museadoaimmaid Oslos Bådåddjui. Sirdima mielde čuvvot sullii 10 bargosaji.
- Dat ahte stáhtalaš bargosajiid lávdadit miehtá riikka lea oassin ráđđehusa politihkas. Seammás sáhttá sirdin leat mielde čielggasmahttimin museadoaimmaid ja nanosmahttimin Kulturráđi doaimmaid oppalaččat, cealká kulturministtar Linda Hofstad Helleland.
- Kulturráđi museafágalaš doaimmaid sirdin Bådåddjui sáhttá beavttálmahttit ealasis kultureallima Nordlánddas. Museasuorggi dovdomearkan lea lávdaduvvon struktuvra, ja dan perspektiivvas lea lunddolaš sirdit museasuorggi doaimmaid eret oaivegávpogis, joatká stáhtaráđđi.
- Bådåddjo lea oalle stuora gávpot gos ásset sullii 50 000 olbmo, doppe lea rikkis kultureallin ja nana museafágalaš biras, mii lea dehálaš sihkkarastit dárbbašlaš gelbbolašvuođa guhkit áiggi vuollái, dadjá kulturministtar Linda Hofstad Helleland.
Kulturráđi museadoaimmat
Norgga kulturráđis lea ovddasvástádus fuolahit direktoráhttadoaimmaid mat gusket museasuorggi ovdáneapmái, hálddašeapmái ja ráđđeaddimii. Ráđđi doaibmá Kulturdepartemeantta fágalaš ráđđeaddin nationála museapolitihkalaš gažaldagain, ja nationála museafierpmádaga ámmátčehppodaga ovdánahttimis. Kulturráđđái gullá maid hálddašit speallanruđaid várrejuvvon ruđaid museaid ođasmahttin- ja huksendoaimmaide. Kulturráđi bargobáiki lea dál Mølleparken:s, Sagene gávpotoasis Oslos.