Historjjálaš arkiiva

Kulturráđis sáhttá dál ohcat ruđa movttiidahttinortnegii

Historjjálaš arkiiva

Almmustahttináigodat Solberga ráđđehus

Almmustahtti: Kulturdepartemeanta

Movttiidahttinortnega ohcanportála rahppui odne. Kulturráđđi juolluda 500 miljovnna kruvnna bisuhit ja ráhkadit doaimmaid kultursuorggis.

– Mun lean hirpmahuvvan man jođánit Kulturráđđi lea ožžon dán áigái! Kulturráđđi lea hirbmat oanehis áiggis ožžon áigái ortnega, ja dál áigot jođánit meannudišgoahtit ohcamušaid. Buohkat barget ovttas vai áššit ovdánit ja máksimat máksojuvvojit jotkkolaččat ja jođánit, dadjá kultur- ja dásseárvoministtar Abid Q. Raja.

– Dál ávžžuhan mun buot lágideddjiid čađahit lágidemiid, eai ge šluhttet daid! Mun sávan ja jáhkán olusiid ohcat, leat olu iešguđetlágan lágideaddjit ja áinnas searvegodderáđit sáhttet maid ohcat, vai mii norgalaččat oažžut eanemus lági mielde juovlakonsearttaid miehtá riikka ja buoremus juovladovddu juovllaide. Mii gal duođas dárbbašat hávskes dovddu maid juovllat addet, dadjá Raja.

Kulturráđđi dahká ohcamušmearrádusa oppalaš árvvoštallama vuođul. Árvvoštallamis galgá deattuhit doarjjaortnega ulbmila, ja erenoamážit geográfalaš lávdama, kulturovdanbuktimiid girjáivuođa, ja ahte kulturfálaldat galgá olbmuid mielas leat olámuttus ja áigeguovdil.

Ohccit miehtá riikka ožžot ruđaid ortnegis. Juolluduvvo ruhta máŋggalágan šáŋŋeriidda, kulturovdanbuktimiidda ja aktevrraide, ja doarjagat galget olahit iešguđetlágan gehččiidjoavkkuid lágidemiid bokte mat ožžot doarjaga. Kulturráđđi ii daga dáiddafágalaš árvvoštallamiid dán ortnega oktavuođas.

Ráđđehusa ulbmil movttiidahttinortnegiin lea veahkkin bisuhit ja ráhkadit doaimmaid kultursuorggis.

– Dát mearkkaša eanet doaimmaid, eanet barggu, ja eanet bálkká sidjiide geat barget kultursuorggis. Dát ortnet addá olu buriid dáidda- ja kulturvásáhusaid miehtá Norgga, ja dat veahkehit bisuhit ealaskas kultursuorggi maiddái maŋŋá go pandemiija lea nohkan, dadjá Abid Q. Raja.

Movttiidahttinortnet gusto golggotmánu 1.b. rájes gitta juovlamánu 31.b. rádjai, ja das lea dalle máhccevaš váikkuhus.

Kulturráđđi hálddaša ortnega ovttas Norgga filbmainstituhtain.

Ohcanportála lea Kulturráđi neahttasiiddus.