Historjjálaš arkiiva

Kultursuorggi movttiidahttinortnegat leat sajis

Historjjálaš arkiiva

Almmustahttináigodat Solberga ráđđehus

Almmustahtti: Kulturdepartemeanta

Dál lea sajis láhkaásahus, man vuođul ollašuhttet kultursuorggi movttiidahttindoaimmaid nu mo ráđđehus lea ovddidan. – Lea leamaš mávssolaš bargat dan ovdii ahte ortnegat doaibmagohtet johtilit, nu ahte doarjagiid besset máksit vuostáiváldiide, dadjá kultur- ja dásseárvoministtar Abid Q. Raja.

Láhkaásahus kulturlágidemiid gaskaboddasaš doarjagiid birra covid-19 geažil (Kulturdoaimmaid movttiidahttinortnet), (dárogillii, Forskrift om midlertidig tilskudd til kulturarrangementer som følge av covid-19 (Stimuleringsordningen for kulturlivet) (Lovdata)

– Mii rievdadit doarjaga nu ahte eat šat buhtat dakkár doaluid goluid, mat eai lágiduvvon, mii movttiidahttit baicce lágidit doaluid. Galgá gánnehit lágidit doaimmaid, joatká stáhtaráđđi.

– Dál deattuhit movttiidahttima – ja juolludit olles 500 miljovnna kruvnno ođđa movttiidahttinortnegii, dadjá Abid Q. Raja.

– Juolludit maid 200 miljovnna kruvnno lágideddjiid ja vuolleleverandevrraid buhtadusaide, muhto dat ortnet geahpeduvvo čavčča mielde.

– Dat mearkkaša ahte don ja mun besse vásihit eanet dáidaga ja kultuvrra, muhto dat mearkkaša maid eanet doaimmaid, eanet barggu ja eanet bálkká ja mávssu sidjiide geaid bargosajit ja ealáhus leat kultursuorggis, dadjá Raja.

Kulturdepartemeanta sáddii movttiidahttinortnega láhkaásahusa gulaskuddamii bearjadaga, golggotmánu 9. b., seammá beaivve go Stuorradiggi nannii juolludeami. Departemeanta vuostáiválddii 35 gulaskuddancealkámuša ja lea johtilit divodan láhkaásahusa oaiviliid vuođul.

Ortnega ulbmilin lea veahkehit kultursuorggi birget ja ceavzit covid-19-roasus. Olles ealáhusgollosii galgá leat ávki ortnegis, mas lágideaddjit ožžot návccaid lágidit doaluid ja máksit sidjiide, geain diŋgojit gálvvuid ja bálvalusaid. Maiddái vuolleleverandevrrat galget dovdat, ahte ruhta lea lihkastan.

Lágideaddjit sáhttet ohcat doarjaga doaluid lágidangoluide. Dat mearkkaša, ahte lágideaddjit ohcet doarjaga mávssuid vuođul, maid mákset artisttaide ja ovdanbuktiide, geat bálkáhuvvojit, ja vuolleleverandevrraide, maid sii geavahit, ovdamearkka dihte lanjaid láiggu ovddas ja lágideaddji iežas bargiid bálkkáide. Dasa lassin rehkenastojuvvo golmma proseantta doallomargiidna.

Kulturráđđi lea dál ráhkadeamen ohcanskovi ja njuolggadusaid ortnega várás, ja dat gárvánit dán vahku mielde. Ortnet galgá doaibmagoahtit fargga, ja Kulturráđđi galgá dađistaga ja johtilit meannudit ohcamušaid ja máksit doarjagiid. Lea mávssolaš ahte ortnet doaibmagoahtá johtilit, vai lágideaddjit dihtet mo dilli lea, ja vai ruhta máksojuvvo johtilit nu ahte sihkkarastet likviditeahta.

Kulturráđđi galgá árvvoštallat ohcamušaid ollislaččat. Kulturráđđi ii galgga árvvoštallat dáiddafágalaš beliid, muhto Kulturráđđi beassá árvvoštallat gullágo ohcamuš ulbmiljoavkku siskkobeallái. Dat galget maiddái fuolahit das, ahte ohccit miehtá riikka ožžot doarjaga, ja ahte doarjja juhkkojuvvo iešguđet šáŋŋeriid ja kulturovdanbuktimiid lágideddjiide, ahte doarjja olaha iešguđet ássiidjoavkkuid ja ahte lágideamit leat nu ollugiid illun go vejolaš. Kulturráđđi galgá maid bargat nu bures go nagodit dan ovdii, ahte váldet vuhtii kulturealáhusa ja kultursuorggi ollislašvuođa.

– Mii háliidit maid sihkkarastit juovllaid ja juovlakonsearttaid, ja danin dohkkehit searvegodderáđiid ohccin. Mun lean movtta go mii dan láhkai sáhttit sihkkarastit ahte lágiduvvojit nu ollu juovlakonsearttat go vejolaš, dadjá Raja.

Kulturráđđi dat hálddaša ortnega.

Kulturráđi čálus movttiidahttinortnega birra 

Loga maiddái Kulturráđi iežas koronadieđuid sin neahttasiiddus