Reviderejuvvon nationálabušeahtta:

Luovosárbi – Mánáid ja nuoraid astoáiggefálaldagat ožžot 6,5 miljovnna kruvnnu

Ráđđehus árvalii diimmá čavčča ahte luovosárbi, mii lea árbi daid olbmuid maŋis geain eai leat árbbolaččat, galgá juogaduvvot eaktodáhtolaš doaimmaide mat bohtet mánáide ja nuoraide ávkin. Stuoradiggi dohkkehii njukčamánus 2015 árbelága rievdadusaid. Dat čuovvoluvvo reviderejuvvon bušeahtas nu ahte Luovosárbi juo 2015:s juogaduvvo eaktodáhtolaš organisašuvnnaide mat ovddidit mánáid ja nuoraid doaimmaid. Mánát ja nuorat geain leat vuoliduvvon doaibmanávccat leat erenoamážit vuoruhuvvon.

- Mii háliidat nannet eaktodáhtolaš doaimmaid ja dahkat dan eanet sorjjasmeahttumin stáhtas. Dat ahte luovosárbbi juogadit eaktodáhtolaš organisašuvnnaide lea dehálaš dan ektui ja dat lea maid Sundvolden-julggaštusa mielde, cealká kulturministtar Thorhild Widvey. 

Ruđat mat 2015:s leat 6,5 miljovnna kruvnnu kanaliserejuvvojit Norgga mánáid- ja nuoraidorganisašuvnnaid Riikkaráđi (LNU) bokte. Dat mielddisbuktá ahte eanaš ruđat  geavahuvvojit doaimmaide ja unnimus lági mielde hálddahussii.

Jahkásaš ruhtasupmi mearriduvvo luovosárbbi sturrodaga ektui maid oažžut guokte jagi ovdal bušeahttajagi.