Nationálabušeahta 2019:
Máhcahit divatlasáhusa šokolada- ja sohkarbuktagiin
Historjjálaš arkiiva
Almmustahttináigodat Solberga ráđđehus
Almmustahtti: Ruhtadandepartemeanta
Preassadieđáhus | Nr: 39/2018 | Almmustahtton: 08.10.2018
Ráđđehus evttoha máhcahit divatlasáhusa šokolada- ja sohkarbuktagiin. Dan lassin galgá lávdegoddi nammaduvvot árvvoštallat sihke dán divada ja divada alkoholakeahtes juhkamušain.
– Divat šokolada- ja sohkarbuktagiin ii leat doarvái bures hábmejuvvon. Lea eahpečielggas makkár buktagiidda dat guoská ja maidda ii. Hástalusat sturro vel eanet go divat lasihuvvui oassin diimmá bušeahttasoabadeami olis, ja erohus divatgeatnegahtti buktagiid ja sullasaš divatkeahtes buktagiid gaskka šattai ain stuorit rievdadusa geažil, dadjá ruhtadanministtar Siv Jensen (OvB).
Ráđđehus evttoha máhcahit divatlasáhusa haddemuddejuvvon dássái mii 2017:s lei. Dat váikkuha maid dasa ahte rádjagávppašeapmi ja neahttagávppašeapmi ii šatta šat nu gánnáhahttin divatgeatnegahtti buktagiid dáfus.
Ráđđehus áigu maid nammadit lávdegotti, masa ealáhusat bovdejuvvojit searvat.
– Mii háliidat ahte lávdegoddi geahčada dárkileabbo šokolada- ja sohkardivada ráddjehusaid, ja maiddái árvvoštallá vejolašvuođaid rievdadit sihke dán divada ja divada mii guoská alkoholakeahtes juhkamušaide, vai váikkuhangaskaoamit buorebut heivehuvvojit dearvvašvuođa- ja biebmopolitihkkii, dadjá ruhtadanministtar.