Eanet ruhta fanasgáhttendoaimmaide

Vuoruheapmi lea oassi ráđđehusa doaibmapáhkas man ulbmilin lea lasihit barggolašvuođa oanehit áigái. Miehtá rittu lea dilli hui duođalaš skiipahuksenindustriijas ja divohatindustriijas.

-Dán doaibmapáhka bokte háliida ráđđehus ahte bargosajit lassánit  skiipahuksenealáhusas seammás go maŋásvuođaáimmahuššamat  ja divodeamit geahppánit gáhttenárvosaš fatnasiin, cealká dálkkádat- ja birasministtar Tine Sundtoft.

Dál gávdnojit sullii 250 gáhttenárvosaš fatnasa. Dain leat njealjenuppelogi fatnasa  suodjaluvvon.

-Jos fatnasat eai geavahuvvo, eai ge divoduvvo, de jávket min historjjálaš fatnasat hui johtilit. Doaibmapáhka bokte lea mis vejolašvuohta sihkkarastit ahte gáhttenárvosaš fatnasat geavahuvvojit ja illudahttet álbmoga, dadjá Sundtoft.

Doaibmapáhka gusto ovtta jahkái, ja ulbmil lea ovddidit barggolašvuođa,  aktivitehtaid ja nuppástuhttimiid. Ruđat juolluduvvojit ohcamušaid vuođul Riikkaantikvára bušeahta bokte.