Muddejit riikii boahtima errennjuolggadusaid

Informasjon om koronasituasjonen endrer seg raskt og kan derfor være utdatert. 

Sjekk temasiden Koronasituasjonen for siste nytt fra regjeringen, eller Helsenorge.no for oversikt over råd og regler om koronaviruset på samisk.

Ráđđehus rievdada máŋgga láhkai njuolggadusaid, mat gustojit erremii, go olbmot bohtet Norgii. Rievdadusaiguin njuolggadusat šaddet čielgasabbon ja dahket bargojohttiid dili geabbilabbon.

Ruoŧa ja Suoma johttibargiid spiehkastatnjuolggadusat heivehuvvojit, nu ahte sii sáhttet geavahit iešguđetlágan vuorroortnegiid. Dál spiehkastit maiddái johttibargiid guovdu, geat bohtet Norgii eanet go oktii 15 beaivvi áigodagas, nu ahte sii maid eai gártta erremii, go bohtet riikii. Dat mielddisbuktá, ahte vahkkojohttit, geain ii leat typihkalaš bargoáigi vuossárggas bearjadahkii, luvvejuvvojit maiddái erremis, go fal váldet iskosiid juohke čihččet beaivve.

Girdibargiid spiehkastat errengáibádusas go bohtet riikii

Girdibargiid spiehkastagat errengáibádusain dahkkojuvvojit čielgasabbon. Dál čohkkejit girdibargiid erenoamáš njuolggadusaid oktan mearrádussan. Namuhuvvo maid čielggasvuođa dihte ahte njuolggadusat gustojit dušše girdibargiide, geaid bargu álggahuvvo Norggas. Dat ii leat ovdal boahtán doarvái čielgasit ovdan. Dasa lassin čilgejuvvo dárkileappot ahte girdibargit, geaidda guoská errengáibádus go sii bohtet riikii, ožžot spiehkastaga bargoáiggis, go sii vulget mátkái, jos sii bisánastet oanehaš botta Norggas.

Internáhtaoahppit luvvejuvvojit errengáibádusas

Vuođđoskuvlaoahppit geat johtet Norgii sámegieloahpahussii, ja geat orrot internáhtas, luvvejuvvojit errengáibádusas, go sii bohtet riikii. Sidjiide gusto dál seammá go joatkkaskuvllaid ohppiide ja studeanttaide, geat johtet Norgga ja Ruoŧa dahje Norgga ja Suoma gaskkas dakkár guovlluin, maidda guoská errengáibádus.

Erren lea beaktilis vuohki, muhto čuohcá sakka olbmuid doaimmaide. Dan ferte geavahit dihto ulbmiliidda, vai dan sihkkarit čuvvot. Ráđđehus háliida dáid rievdadusaiguin fuolahit, ahte njuolggadusat leat sihke beaktilat, ja maiddái muttágat.

Rievdadusat leat fámus skábmamánu 20. b. 2020 gaskaija rájes.