Nanne psyhkalaš dearvvašvuođa- ja gárrendivššu vuosttašceahkkefálaldaga

– Psyhkalaš dearvvašvuođa- ja gárrensuorgi gullá ráđđehusa deháleamos áŋgiruššansurggiide. Ráđđehus áigu addit sidjiide, geat rahčet psyhkalaš dearvvašvuođahástalusaiguin ja gárrenváttesvuođaiguin, veahki man lea álki fidnet, earret eará ulbmillaš doaibmabijuid bokte eaktodáhtolaš organisašuvnnaid olis. Danne nannet mii máŋga doarjjaortnega dán suorggis 2023:s, dadjá dearvvašvuođa- ja fuolahusministtar  Ingvild Kjerkol.

­– Psyhkalaš dearvvašvuođa ceahkkálastinplána bokte mii biddjojuvvo ovdan dán jagi, ja gárrensuorggi eastadan- ja dikšunođastusa bokte ođđajagis 2024, áigut mii buoridit eastadeami ja árabut addit buori veahki ja čuovvuleami, muitala Kjerkol.

Ráđđeaddindoarjja

Doarjjaortnet Ráđđeaddin-, doarjja- ja bagadusbálvalusat nannejuvvojit 25 miljovnna ruvnnuin.

Doarjja manná vuosttažettiin ideála organisašuvnnaide ja gielddaide mat doaimmahit telefonbálvalusaid dahje chatten-bálvalusaid olbmuide geat vásihit váttisvuođaid psyhkalaš dearvvašvuođa, gárrendili ja veahkaválddi oktavuođas. Maiddái earálágan ráđđeaddin-, doarjja- dahje bagadanfálaldagat sáhttet ohcat doarjaga.­– Dat addá eanet organisašuvnnaide vejolašvuođa ohcat ruđaid dán bivnnuhis doarjagis, dadjá Kjerkol.

Aktivitehtadoarjja

Aktivitehtadoarjja ideála ja eaktodáhtolaš organisašuvnnaide mat addet aktivitehtafálaldaga psyhkalaš dearvvašvuođa- ja gárrensuorggis, nannejuvvo 10 miljovnna ruvnnuin.

– Ollugat geain leat psyhkalaš dearvvašvuođa- dahje gárrenváttesvuođat eai leat bargguin eai ge searvva aktivitehtafálaldagaide. Go mii nannet aktivitehtadoarjaga, de mii addit máŋggabealat aktivitehtaid daidda joavkkuide maid mii háliidit olahit, dadjá Kjerkol.

– Valáštallanaktivitehtat ja sosiála aktivitehtat váikkuhit dasa ahte olbmot geain leat gárren- ja/dahje psyhkalaš dearvvašvuođaváttisvuođat vásihit ahte sii birgejit ja ahte sis lea vejolašvuohta olahit aktiiva ja ulbmillaš eallima.

Fontenedálut ja Oapmahašguovddáš

Doarjja fontenedáluide nannejuvvo 10 miljovnna ruvnnuin. Fontenedáluin oažžu bargohárjáneami ja hálddašanvásáhusaid ulbmillaš aktivitehtaid ja sosiála searvevuođa bokte, dainna áigumušain ahte veahkit oassálastiid máhccat dábálaš bargoeallimii ja ohppui.

Oapmahaččat leat sihke dehálaš resurssat ja joavku mii dávjá vásiha stuorra noađuhemiid. Danne nanne Ráđđehus juolludusaid Oapmahašguovddážii 8 miljovnna ruvnnuin. Doarjja galgá fuolahit veahki, duddema ja bagadallama oapmahaččaide.