Nannejuvvon ovttasbargu olmmošgávppašeami vuostá

Ráđđehus almmuha odne ođđa doaibmaplána olmmošgávppašeami vuostá. Doaibmaplána galgá leat koordinerejuvvon bargu, mas almmolaš eiseválddit ja eaktodáhtolaš organisašuvnnat barget ovttas bissehit vearredaguid ja suodjalit gillájeddjiid.

– Olmmošgávppašeapmi lea ođđaáigásaš šlávavuohta, ja lea govda politihkalaš ovttaoaivilvuohta ahte Norggas ii galgga dáhpáhuvvat olmmošgávppašeapmi. Doaibmaplánas leat olu iešguđetlágan doaibmabijut guđa stáhtaráđi surggiin. Ráđđehus áigu earret eará nannet eastadeami ja buorebut áimmahuššat gillájeddjiid. Dasa lassin galgá doaibmaplána leat mielde sihkkarastimin ahte politiijaid bargu beavttálmahtto lagašpolitiijareforpma vuođul, dadjá justiisa- ja gearggusvuođaministtar Anders Anundsen (Ob). 

Viđa departemeantta guhtta stáhtaráđi dat leat ráhkadan doaibmaplána:

  • Justiisa- ja gearggusvuođaministtar Anders Anundsen
  • Sisafárren- ja searvadahttinministtar Sylvi Listhaug
  • Mánáid- ja dásseárvoministtar Solveig Horne
  • Bargo- ja sosiálaministtar Anniken Hauglie
  • Olgoriikaministtar Børge Brende
  • Dearvvašvuođa- ja fuolahusministtar Bent Høie

26 doaibmabiju

Doaibmaplánas leat 26 doaibmabiju njealji váldooasis:

  • Ovttastahtton ja beaktilis doaibmabijut suodjalit ja ovddidit gillájeddjiid vuoigatvuođaid
  • Buoridit politiijaid organiserema ja barggu
  • Eanet máhttu almmustahttit ja eastadit olmmošgávppašeami
  • Nannet riikkaidgaskasaš ovttasbarggu olmmošgávppašeami vuostá

Leat erenoamážit deattuhan doaibmabijuid mat galget eastadit olmmošgávppašeami mas vuolleahkásaččat ávkkástallojuvvojit. Dát gullá buot njealji váldooassái.

– Mus leat stuorra vuordámušat dasa ahte politiijaid bargu olmmošgávppašeami vuostá buorrána. Lea eaktun lagašpolitiijareforpmas ahte buot politiijaguovlluin galgá leat gelbbolašvuohta dáistalit olmmošgávppašeami vuostá. Doaibmabijut dán doaibmaplána politiijasuorggis galget sihkkarastit ahte politiijaid bargu ja rutiinnat áššiin mat gusket mánáide, leat beaktilat, dadjá Anundsen.

Loga doaibmaplána

Regjeringens handlingsplan mot menneskehandel (PDF, 1 mb)