Nationála vahkkosaš mediafálaldagaid doarjjahálddašeapmi sáddejuvvo gulaskuddamii

Almmustahttináigodat Solberga ráđđehus

Almmustahtti: Kulturdepartemeanta

Kulturdepartemeantta árvalus sirdit vahkkosaš aviissaid ruhtahálddašeami Norgga kulturráđis Mediabearráigehččui sáddejuvvo otne gulaskuddamii. Seammás rievdaduvvo ođas- ja áigeguovdilisáššiid mediafálaldagaid buvttadandoarjja dainna lágiin ahte nationála vahkkosaš mediafálaldagaide ásahuvvo sierra doarjjaortnet.

Gulaskuddanášši (girjegillii)

Árvalus mielddisbuktá ahte ruhtadoarjja vahkkosaš aviissaide dievasmahttojuvvo ja ođasmahttojuvvo. Ollugat leat moaitán dálá ortnega dan sivas go doarjja árvvoštallojuvvo redakšuvnnalaš kvalitehta ektui.

-Mii fertet sihkkarastit ahte mis leat sorjjasmeahttun ja bealátkeahtes mediat, ja dan geažil lea dehálaš ahte stáhtadoarjja meannuduvvo čielga ja objektiivvalaš njuolggadusaid vuođul ja ii ge  hálddašaneiseválddiid árvvoštallama vuođul, cealká kulturministtar Thorhild Widvey.   

Seammá go buvttadandoarjja ge, de galgá doarjja juolluduvvot beroškeahttá ovdanbuktinvugiin, dat mearkkaša ahte bábiralmmuheapmi ii gáibiduvvo doarjaga oažžumis.

Árvalus sisttisdoallá muđui čuovvovaččat:

- Doarjja juolluduvvo “nationála vahkkosaš mediafálaldagaide”, definišuvnna mielde dat mediat mat prentejit unnimus 1000 gáhppálaga, vuvdet unnimus 30 pst. prentenlogus almmuhusfylkka olggobealde ja mat prentejit uhcimus 50 gáhppálaga okta goalmmát oasis riikka fylkkain. Muđui fertejit doarjjavuostáiváldit čuovvut daid seamma eavttuid mat gustojit buvttadandoarjjaortnegii. 

- Doarjja juolluduvvo vuođđodoarjjan ja rievdavašdoarjjan. Vuođđodoarjja lea seamma stuoris buohkaide geat ollašuhttet gáibádusaid. Rievdavašdoarjja juolluduvvo prentenlogu vuođul ja das leat guokte máksomeari, alla máksomearri vahkkosaš mediafálaldagaide mat geavahit eanaš ođđadárogiela ja vuollegis máksomearri eará vahkkosaš mediafálaldagaide.

- Departemeanta mearrida jahkásaččat doarjjamáksomeari ja vuođđodoarjaga ja rievdavašdoarjaga juogadeami, mearriduvvon bušeahta ja suorggi ekonomalaš dili ektui. Seammá gusto buvttadandoarjagii.

Árvalus sáddejuvvo dál gulaskuddamii. Dan lassin ferte ESA notifiseret ja dohkkehit doarjjaortnega ovdal go dat fápmuduvvo.