Stáhtabušeahtta 2018
Našunálateáhtera ođasteami álggaheapmi
Historjjálaš arkiiva
Almmustahttináigodat Solberga ráđđehus
Almmustahtti: Kulturdepartemeanta
Preassadieđáhus | Nr: 87/17 | Almmustahtton: 13.10.2017
Ráđđehus deattuha sihkkarastit našunála kulturhistorjjálaš visttiid ja buriid lanjaid dehálaš kulturásahusaide. Lea dárbbašlaš ođastit Našunálateáhtera visttiid. Ráđđehus evttoha 10 milliuvnna ruvnna álggahit ovdaprošekterema 2018:s.
– Našunálateáhter lea dehálaš našunála kulturásahus ja okta min čábbáseamos kulturhistorjjálaš visttiin. Lea dárbbašlaš čađahit stuorit ođastemiid Našunálateáhteris vai sihkkarastá vistti boahtteáigái, ja ráđđehus láhčá diliid buoremus lági mielde vai prošeakta ovdána. Danne leat evttohan juolludit 10 milliuvnna ruvnna álggahit ovdaprošekterenbargguid 2018:s, lohká kulturministtar Linda Hofstad Helleland.
Lea čađahuvvon vuđolaš guorahallan makkár molssaeavttut gávdnojit ođastit ja ovddidit teáhtera. Lea maiddái čađahuvvon nu gohčoduvvon konseaptaválljen-guorahallan (KVG) mii lea leamašan olggobeale kvalitehtasihkkarastin KS1 iskamiin.
Konseaptaválljenguorahallama ja kvalitehtasihkkarastinproseassa vuođul lea ráđđehus válljen makkár konseptuála čoavddus galgá biddjot vuođđun dán prošeavttas. 2017:s čađahuvvo čielggadanoassi mii lea ráđđehusa bajimus dási konseaptaválljema ektui, ja dat lea dasto dán ovdaprošeavtta vuolggasadji.