Norga laktása EU koronaduođaštusaid vuogádahkii

Informasjon om koronasituasjonen endrer seg raskt og kan derfor være utdatert. 

Sjekk temasiden Koronasituasjonen for siste nytt fra regjeringen, eller Helsenorge.no for oversikt over råd og regler om koronaviruset på samisk.

Duorastaga, geassemánu 24. beaivve Norga searvvai EU koronaduođaštusvuogádahkii. Olbmot geat leat ollásit boahkuhuvvon dahje geain lea leamaš koronadávda maŋimuš guđa mánus, ja geain lea gustovaš koronaduođaštus, besset dál boahtit Norgii. Sii eai dárbbaš leat erremis, eai válddihit iskosiid eaige dárbbaš registreret riikii boahtima. Suoidnemánu 1. beaivvi rájes Eurohpá riikkat, mat gullet EU čovdosii, sáhttet iskagoahtit Norgga koronaduođaštusaid iežaset rájáin.

– Eurohpá lea ovttasbargan jođánit, beaktilit ja bures, ja nu beassat váldit atnui koronaduođaštusčovdosa jo duorastaga. Dat álkidahttá sakka daid olbmuid johtima, geat leat boahkuhuvvon ollásit dahje geat leat buohcan korona. Dat mearkkaša ollu eaŋkilolbmuide ja Norgga mátkeealáhusa mávssolaš bargosajiide, dadjá dearvvašvuođa- ja fuolahanministtar Bent Høie.

Koronaduođaštus Norgga rájáin
Olbmot, geat leat ollásit boahkuhuvvon, dahje geat leat buohcan koronain maŋimuš guđa mánus, ja geat dan sáhttet duođaštit koronaduođaštusain, maid EU-čovdosiin sáhttet verifiseret, besset dál boahtit Norgii geahčakeahttá dasa guđe riikkas sii bohtet. Sii eai dárbbaš leat erremis, eai dárbbaš válddihit iskosiid ovdal go bohtet eaige rájá alde, eaige dárbbaš registreret riikii boahtima.

Geassemánu 24. beaivvi rájes Norga sáhttá verifiseret eará EU/EES-riikkaid koronaduođaštusaid, jos dat gullet EU čovdosii. Dál čovdosii gullet Nuortariika, Bulgaria, Belgia, Kypros, Duiska, Estteeana, Suopma, Frankriika, Kroatia, Islánda, Polska ja Latvia. Eat dattetge dieđe leatgo namuhuvvon riikkat geavadis vel váldán atnui koronaduođaštusa ja ráhkadišgoahtán dakkára iežaset ássiide.

Koronaduođaštusa geavaheapmi eará riikkain
Suoidnemánu 1. beaivve bohtet EU koronaduođaštusat fápmui. Eanaš EU-/EES-riikkat gullet dalle EU čovdosii, ja nagodit de verifiseret Norgga koronaduođaštusaid rájáineaset. Dat guoská earret eará Espánnja, Italia, Hellas ja Kroatia.

– Dat, geat válljejit johtit, fertejit ieža lohkat dan riikka erren-, iskkahan- ja njoammuneastadannjuolggadusaid, gosa sii mannet. Iešguđet riikkain leat iešguđetlágan njuolggadusat, dadjá Høie.

Sáhtát lohkat EU/EES-riikkaid njuolggadusaid neahttasiiddus reopen.europa.eu.

Koronaduođaštus, maid rájás galgá čájehit, rievdá geassemánu 24. beaivve ja dasa ihtá EU/EES mearka.

Geahča iežat koronaduođaštusa helsenorge.no-neahttasiiddus

Olbmot geat eai geavat digitála čovdosiid
– Mii leat dál gárven koronaduođaštusa maiddái sidjiide, geat eai sáhte geavahit dihtora, mobiilatelefovnna eaige neahttafiellu. Ihttá rájes sii sáhttet riŋget koronadiehtojuohkintelefovdnii, ja sidjiide sáddejit dasto koronaduođaštusa poastta mielde. Mii sávvat dattetge ahte eatnašat geavahit digitála čovdosa, mii lea helsenorge.no-neahttasiiddus, ja ahte dárbbu mielde čálihit duođaštusa ruovttus, dadjá Høie.

Jos riŋget Helfo diehtojuohkintelefovdnii, don fertet almmuhit persovdnanummira. Koronaduođaštus sáddejuvvo dasto álbmotregistarii merkejuvvon čujuhussii. Ii leat vejolaš sáddet koronaduođaštusa eará čujuhussii, go dasa, mii dutnje lea merkejuvvon Norgga álbmotregisttaris.

Jos du koronaduođaštus lea fámus, dan sáddejit dutnje poastta mielde. Fuomáš, ahte duođaštusa boahtin sáhttá ádjánit sullii vahku, go poastta johtin váikkuha dasa. Berret maid diehtit, ahte duođaštus lea fámus 90 beaivvi čáliheami rájes.

Korona diehtojuohkintelefovnna nummir:

Rabas vuossárggas bearjadahkii dii 08.00 – 15.30

Norggas: 815 55 015

Olgoriikkas: +47 21 89 80 42

Koronaduođaštusa sáhttá dálá dilis geavahit čuovvovaš ulbmiliidda:

  • Duođaštit boahkuheami, ahte leat buohcan dávddá dahje ožžon negatiiva iskkusbohtosiid go jođát riikkaide, mat leat váldán atnui EU čovdosa.

  • Duođaštit, ahte it dárbbaš leat erremis, válddihit iskosa ovdal riikii boahtima dahje rájá alde, ja ahte it dárbbaš registreret riikii boahtima go boađát Norgii. (Gáibiduvvo ahte leat ollásit boahkuhuvvon dahje ahte dus lea leamaš covid-19 maŋimuš guđa mánus).

  • Searvat stuorát lágidemiide.

  • Searvat riddocruise-mátkái, masa gáibiduvvo koronaduođaštus. (Gáibiduvvo ahte leat suddjejuvvon. Don leat suddjejuvvon go leat ollásit boahkuhuvvon, boahkuhuvvon oktii 3 – 15 vahku dassá dahje go leat buohcan covid-19 maŋimuš guđa mánus).