Norga rahpá ođđa veahkkedoaimmaid Gaskaábis

Stáhtaministtar Erna Solberg lea otne sádden reivve EO-njunnošiidda ahte Norga háliida ain joatkit gulahallama Gaskaábi váttis dili birra. Norgga ráđđehusas lea dál áigumuš sáddet skiippa dán guvlui nu johtilit go vejolaš.

- Lean ilus go EO áigu politihkalaččat gieđahallat dan váttis dili mii Gaskaábis dál lea. Dat lea hástalus maid Eurohpá oktasaččat ferte čoavdit ja Norga áigu váldit iežas ovddasvástádusa, cealká stáhtaministtar Erna Solberg.

Stáhtaministtar lea sádden reivve Eurohpá-kommišuvnna presidentii Jean-Calude Juncker:ii ja Eurohpá Ráđi presidentii Donald Tusk. Reivviin Solberg čállá ahte son fuolastuvvá go báhtareaddjit ja sisafárrejeaddjit heađis geahččalit boahtit Eurohpái.  Norga lea lohpidan sáddet siviila fatnasa Gaskaáhpái borgemánu 1.b.rájes maŋŋil go organisašuvnnain Frontex:in  lea soahpan makkár veahki Norga sáhttá addit. Solberg čállá reivves ahte ráđđehus dál hoahpuha veahkkedoaimmaid ja áigu daid bidjat johtui nu johtilit go vejolaš. Vuossárgga čielggai ahte lea vejolaš geavahit spiehkastanmearrádusaid mat gusket láhkii almmolaš háhkamiid birra ja dahkat soahpamuša vai skiipa beassá johtui johtilit.

- Norgga ulbmil lea ahte fanas galgá doaibmagoahtit nu johtilit go vejolaš. Fanas galgá erenoamážit geavahuvvot Triton doaimmaid oktavuođas guhtta mánu, čállá  Solberg reivves.

Ráđđehus almmuhii maŋŋebárgga ahte áigu juolludit 50 miljovnna kruvnnu heahtedoarjaga ON ja eará organisašuvnnaid bokte veahkehit báhtareddjiid Gaskaábis. Reivves EO-njunnošiidda dieđiha Solberg ahte Norga dán áššis háliida lagas ovttasbarggu EO:in, ja ahte Norga háliida gulahallat movt riikkat ovttas sáhttet addit eanet veahki geahpedan dihte váttisvuođaid.